Qilalukkat qernertat Upernaviup aqutsiveqarfianiittut allanit piniarneqassanngillat

Naalakkersuisoqarfik piniarnermut nakkutilliisumit ilisimatinneqarpoq piniartut Uummannap aqutsiveqarfianiit aqutsiveqarfik Upernavimmut qilalukkanik qaqortanik piniariarsimasut. Naalakkersuisoqarfimmit erseqqissaatigineqassaaq piniartut aqutsiveqarfik Uummannameersut qilalukkanik qernertanik namminneq aqutsiveqarfimminni taamaallaat piniaqqusaammata, tassa zone 4-mi. Nunap assinga ilanngussaq takuuk.

Naalakkersuisoqarfiup juunip 4-anni 2021-mi nalunaarutigaa aqutsiveqarfik Upernavimmi qilalukkanik qernertanik qilalugartassiissutit tamakkerneqareersut. Taamaattumillu aqutsiveqarfik Upernavimmi qernertarniarneq unitsinneqarluni.

Qernertanik qilalugartassiissutit taamatullu piniarfissat Naalakkersuisunit uumasoqatigiikkuutaartumik aalajangersarneqartarput. Upernaviup eqqaani qernertanik qilalugaqatigiit (Zone 3) Uummannallu eqqaaniittut (Zone 4) immikkoorput. Taamaammat piniartut aqutsiveqarfiit allaneersut, soorlu aqutsiveqarfik Uummannameersut Upernaviup aqutsiveqarfianut qernertanik qilalugarniaqqusaanngillat.

Naalakkersuisoqarfimmut aamma ilisimatitsissutigineqarpoq Avannaata Kommuneani qassusersorluni kommunemi ileqqoreqqusaqanngitsoq, taamaakkaluartoq qassusersorluni qilalugarniartoqartarluni. Qilalukkat pillugit nalunaarummi atuuttumi allaqqavoq aqutsiveqarfik Qaanaami qassusersorluni taamaallaat qilalugarniartoqarsinnaasoq, kommunimili ileqqoreqqusaq aatsaat atuutilersinneqarpat. Avannaata Kommuneani maanna ileqqoreqqusaqanngilaq.

Piniartut tamarmik, aqutsiveqarfik Upernavimmeersut aamma Uummannameersut, ilisimatitsineq naapertorlugu, Upernaviup aqutsiveqarfiani qaqortanik qilalugarniartut peqquneqarput pisatik tamaasa nalunaarutigissagaat. Naalakkersuisoqarfimmit aamma erseqqissaatigineqarpoq piniartut qilalugarniartinnatik Sullissivimmut akuersissummik qinnuteqaqqaartassasut, piumasaqaatigineqartut naapertorlugit akuersissut takussutissatut nassartartussaavaat.

Qernertanik aamma qaqortanik qilalugarniarnermi unioqqutitsinerit akiliisitsinermik aamma pisamik arsaarinnissuteqarnermik Kalaallit Nunaanni pinerluttulerinermik inatsit naapertorlugu pineqaatissiissutaasinnaapput, taamatullu pisoqartillugu politiit suleqatigineqartarlutik.


Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 06, e-mail: amalie@nanoq.gl