Ukioq manna eqeersimaartut pilluaqquagut

Timimik aalatitsinerunissaq pillugu Paarisap unammisitsinerani ajugaasut toqqarneqaqqammerput. Ukioq manna atuarfik, suliffeqarfik inuiaqatigiinnilu eqeersimaartut novembarip tallimaanni Maligassiuisut Show-imi nersorneqarlutillu nersornaaserneqarput.

Maligassiuisut Show-imi Paarisa, Isumaginninnermut Aqutsisoqarfimmi immikkoortortaqarfiusoq, Kalaallit Nunaanni Timersoqatigiit Kattuffiat aamma Elite Sport Greenland timersornermut peqqissutsimullu tunngatillugu maligassiuisunik aallussilluartunillu, tamatsinnit isumassarsiorfigineqarsinnaasunik, nersornaasiipput. Nersornaasiinermi nipilersornermik, qitinnermik erinarsoqatigiinnermillu aliikkusersuisoqarpoq. Maligassiuisut Show KNR TV-kkut toqqaannartumik aallakaatinneqarpoq.

Qaqortumi Tasersuup Atuarfia ukioq manna atuarfittut eqeersimaartutut toqqarneqarpoq
Tasersuup Atuarfiani siunnerfeqartumik suliniuteqarnikkut atuarnerup nalaani ilinniartitsinermilu timimik aalatitsinerulersitsineq anguneqarsimavoq.

Meeqqat timertik atorlugu sammisaqarneq assut iluarisarpaat. Eqqissisimanerulerlutillu nuannaarnerulerlutillu nalerisimaarnerusarput.
Atuarnerup nalaani timimik aalatitsisarnikkut meeqqat timersorneq ajortut timiminnik aalatitsinissamut timimillu atuinermik ilinniarnissamut periarfissinneqartarput.
Tasersuup Atuarfiata takutippaa ilinniartitsinerup nalaani timimik atuineq atuartut ataatsimoortutut misiginerannik, ilinniarsinnaanerannik nuannaarnerannillu annerulersitsisumik atuarfik qanoq peqqinnartumik timimillu atuiffiusumik ataatsimoorfeqarnissamut tunngavissiisinnaanersoq.

Mittarfeqarfiit Nuummi qullersaqarfia ukioq manna suliffeqarfittut eqeersimaartutut toqqarneqarpoq
Mittarfeqarfiit suliffeqarfiuvoq sulinerup nalaani timimik aalatitsinissamik pingaartitsisoq, taamaaliorpullu tamanna suliffimmi avatangiisinik pitsaanerulersitsisarmat sulisunillu assut naammagisimaarnerulersitsisarmat.
Sund-MIT, sulinerup nalaani timersornissamut periarfissaqarneq, sulisunut tamanut ajunngitsorsiassaavoq. Sulisut ukiukkut aasakkullu timimik aalatitsinissamut ukioq naallugu pilersaarusiuunneqartarput. Tamatumani sulisut ilaatigut timigissartarfiliarnermut, nalugiarnermut qaqqamullu pisuttuarnermut ilaanissamut periarfissaqarput.
Mittarfeqarfiit takutippaat ataatsimoornerup pitsanngorsarnerata immikkoortortaqarfiillu akimorlugit peqatigiittarnerup saniatigut sulinerup nalaani timimik aalatitsinerulerneq sulisut peqqinnarnerusumik inooriaaseqarnissamut qanoq periarfissinneqartartut.

Attumiu Jens M. Larsen ukioq manna inuiaqatigiinni eqeersimaartutut toqqarneqarpoq
Jens M. Larsen kattuffimmi Arfeq-85-imi siulittaasutut Attumi meeqqanut inuusuttunullu ukiup ingerlanerani amerlasuunik sammisassaqartitsinissamik sulissuteqartarnermigut aallussilluartuuvoq.

Sammisassaqartitsinerit amerlasuut pinngortitarsuarmik kulturimillu aallaaveqartarput. Jens M. Larsen ukiup ingerlanerani ilaatigut meeqqanik inuusuttunillu ammassanniartitsisarlunilu eqalunniartitsisarpoq, aamma qimussersuarmik aaqqissueqataasarpoq. Tamatuma saniatigut nerrivimmi arsaararnermi, isikkammik arsarnermi arctic sportimilu sungiusaasuuvoq.

Jens M. Larsenip meeqqanut inuusuttunullu timimik aalatitsiffiusunik, peqqinnartunik akuutitsiffiusunillu ataatsimoorfinnik pilersitseqataanikkut takutippaa innuttaasutut qanoq inuiaqatigiinni sunniuteqaqataasoqarsinnaasoq.

Paarisap nersorneqartut tamaasa pilluaqquai. Paarisa.gl-ikkut ukioq manna eqeersimaartut pillugit immiussat naatsut takusinnaavatit – imaluunniit takoqqissinnaavatit.

Paasisaqarnerujumallutit attavigiuk Paarisami immikkoortortaqarfimmi pisortaagallartoq Tina Evaldsen oqarasuaatikkut +299 34 23 94 imaluunniit e-mailikkut tiev@nanoq.gl