Nunat Avannarliit Siunnersuisoqatigiivisa Atuakkiortumut nersornaasiuttagaanik Niviaq Korneliussen tuneqarneravit pilluarit

Kalaallit atuakkiortut siullersaattut Nunat Avannarliit Siunnersuisoqatigiivisa Atuakkiortumut nersornaasiuttagaa ataqqisaasoq, Niviaq Korneliussenip atuakkiaminut “Naasuliardarpi”-mut ulloq 2. november nersornaatisiaraa. Nersornaammut eqqortumik tunniunneqartumut Niviaq pilluaqujumavara aamma sapeeqaluni inuusuttut sinnerlugit imminut toquttarneq pillugu sammisamut pingaarutilerujussuarmut oqaasertaliineranut qujaffigiumavara.

Imminut toquttarnerup tamanut ammasumik oqaluuserineqalernissaanut sammisamillu paqumiginninnerup nungutinneqarnissaanut Naasuliardapiup Kalaallit Nunaanni inuusuttut akornanni imminut toquttarneq pillugu allaaserinninnera peqataavoq. Kisitsisit atorlugit nassuiaasiortarnerni imminut toquttarneq pillugu kisitsisit alianartut, Niviamit “Naasuliardarpi”-mi attortinnaqisumik allaaserineqartut, allanngortinneqarnissaat Meeqqanut, Inuusuttunut Ilaqutariinnullu Naalakkersuisutut pingaartittorujussuuara. Imminut toquttarnerup aqqutissatuanngorneranik kinaluunniit misigitinneqartariaqanngilaq.

Nunatsinni imminut toquttarnerit ikilisissagutsigit, inuit Niviatut ittut tusarnaarnissaat pingaaruteqarpoq, tassami imminut toquttarneq sammisaavoq assigiinngitsorpassuarnik katitigaasoq. Atuakkiornermigut oqallinnermilu ersarissumik nipeqarnermigut Niviap imminut toquttarnermik ajornartorsiuteqarneq paasinartumik ersersippaa. Imminut toquttarnerup pitsaaliorneqarnerani Niviaq maligassiuisuuvoq pingaaruteqartoq – pingaarnertullu inuusuttunut tamanut, imminnut toqunnermik nalaataqarsimasunut imaluunniit nammineq imminut toqunnissamik eqqarsaateqarsimasunut – maligassiuisuulluni.

Nersornaatisiat pillugu uummammit pisumit pilluaqquakkit oqallinnermilu nipinnut pingaaruteqaqisumut qamannga pisumik qutsavigalutit.

Inussiarnersumik inuulluaqqusillunga
Paneeraq Olsen
Meeqqanut, Inuusuttunut Ilaqutariinnullu Naalakkersuisoq