Nunatsinnit umiarsuarnik avatangiisinut isumannaallisaanermullu isumannaatsumik isaterisarnissaq qulakkeerniarneqarpoq

Nunatta Hong Kong-imi isumaqatigiissummut ilaalernermigut nunarsuarmi maleruagassanut, nunarsuarmi nunani kinguarsimanerusuni umiarsuarnik isaterisarnermiajornartorsiutit iluarsinissaannut tapersiinini takutippaa. Umiarsuarnik isaterisarneq inunnut avatangiisinullu ulorianartorsiortitsiviusumik akuttunngitsumik ingerlanneqartarpoq.

Nunarput Hong Kong-imi isumaqatigiissummut, FN-ip Imarsiornermut Suliniaqatigiiffianit (IMO) akuerineqartumut 2009-mi ilaalerpoq. Tamanna umiarsuit angisuut nunarsuarmi nunani kinguarsimanerusuni akulikippallaamik ajornartorsiortitsiviusumik isaterneqartarnerat paasineratigut pivoq. Nunarput nunani tamalaani piumasaqaatinut, Hong Kong-imi isumaqatigiissummi umiarsuarnut suliffeqarfinnullu isaterisartunut piumasaqaatigineqartunut ilaalernermigut tapersiivoq. Nunani tamalaani piumasaqaatit, nunatsinnit maanna ilaaffigineqalersut inuit avatangiisillu pitsaanerusumik illersorneqalernissaannut qulakkeerissutaasussaapput.
- Nunarsuarmi umiarsuarnik isaterisarnerit amerlanersaat nunarsuarmi nunani kingusarsimanerusuni ingerlanneqartarpoq. Tamatuma peqatigisaanik umiarsuarnik isaterisarnerit avatangiisit isumannaallisaanerlu eqqarsaatigalugit isumannaatsumik ingerlanneqartannginnerinut assersuutissarpassuaqarpoq. Tamanna arlaannaanulluunniit iluaqutaanngilaq. Ilaalernitsigut maligassiuussinitsinnik nunarsuup sinneranut nukittuumik oqariartuuteqarnerput, aamma inoqatitsinnik avatangiisinillu pingaartitsilluarnerput takutipparput. Taama Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Paasissutissat
Hong Kong-imi isumaqatigiissut suli atuutilinngilaq. Tamanna aatsaat nunat ikinnerpaamik 15-it (nunarsuarmi umiarsuit niuffagiutit 40%-iinik pigisaqartut) akuersissummut ukiut marluk qaangiunnerini akuersereernerini pisussaavoq. Nunat 15-it (nunarsuarmi umiarsuit niuffagiutit 29,62%-iinik pigisaqartut) isumaqatigiissummut maanna akuersisimapput. Nunatta Hong Kongimi isumaqatigiissummut ilaalernermigut nunarsuarmi maleruagassanut, nunarsuarmi nunani kinguarsimanerusuni umiarsuarnik isaterisarnermi ajornartorsiutit iluarsinissaannut tapersiinini takutippaa.

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen tlf.: 346476/529844-imut imaluunniit e-mail: mesp@nanoq.gl imaluunniit pan@nanoq.gl aqqutigalugit attaveqarfigineqassaaq.