Niviaq Korneliussen Nunat Avannarliit Siunnersuisoqatigiivisa atuakkiortumut nersornaasiuttagaannik tunineqarnerani pilluaqquarput

Niviaq Korneliussenip atuakkiaa “Naasuliardarpi” Nunani Avannarlerni atuakkiortunut nersornaammut nunatsinniit innersuunneqarnikuuvoq. Nersornaat tassaavoq nunarsuarmi atuakkiortunut akimanerpaanut ilaasoq. Ippassaq novembarip aappaanni 2021-mi Københavnimi nersornaasiinerit toqqaannartumik aallakaatinneqarneranut assut pissangalluta nunatsinniit malinnaavugut. 

 

Nunani Avannarlerni atuakkiortunut nersornaammut innersuunneqarnikut akornanni assut nuannaarutigeqisatsinnik illit Niviaq Korneliussen toqqarneqarputit.

 

Tulluusimaarnarpoq Nunani Avannarlerni atuakkiortunut nersornaasiisarnerup aallartinneraniilli nunatsinneersumik siullersaallutit nersornaaserneqaravit. Nersornaat pingaaruteqartoq ilinnut atuakkiortutut atuakkiannullu nittarsaassilluassaaq, isumalluarnarporlu nunatsinni atuakkiortut allat aammattaaq sunniuteqarfigilluassagaat.

 

Atuakkianni sammivat nunatsinni inuusuttuuneq, ilaatigut qulequttat imaannaanngitsut sammillugit soorlu imminut toquttarnermut tunngasut. Sammisatit inuiaqatigiinni politikkikkullu eqqartussallugit iliuuseqarfigissallugillu pingaaruteqarluinnarput, qujanarlu inuusuttut nipaat atuakkiornerup silarsuaa aqqutigalugu apuukkakkit.

 

Suliamut kusanartumut pilluangaarit, siunissamilu angusaqarluaqqinnissannut kissaappatsigit.

 

 

 

Inussiarnersumik inuulluaqqusillunga

Med venlig hilsen

 

 

Peter Olsen