Issittumi suleqatigiittoqarnissaanut suliniutit kikkunnilluunniit qinnuteqarfigineqarsinnaasut 10 mio. kr.-inillu aningaasartallip aqunneqarnera Kalaallit Nunaata tigoqqammerpaa

Issittumi suleqatigiittoqarnissaanut suliniutit kikkunnilluunniit qinnuteqarfigineqarsinnaasut 10 mio. kr.-inillu aningaasartallip aqunneqarnera Kalaallit Nunaata tigoqqammerpaa.

Naalakkersuisunimi ilaasortaq Kalistat Lund Nunani Avannarlerni Suleqatigiinnermut Naalakkersuisunngoqqammerluni Nunani Avannarlerni Siunnersuisoqatigiit ataatsimiinneranni siullermeerluni peqataavoq. Issittumi suleqatigiittoqarnissaanut suliniutit "Issittoq piujuartitsiffiusoq"-mik qulequtaqartinneqartumi oqalugiarnermini pilersaarut nunat avannarliit akimorlugit Issittup suleqatigiissutigineqarnissaanut tapersersorneqarnissaanut ineriartortinneqarnissaanullu sakkussatut uuttortaatissatullu pingaarutilittut atorneqarsinnaassasoq pingaartillugu ilaatigut oqaatigaa. Nunatta nunatut Issittumiittutut Issittumi suleqatigiittoqarnissaanut suliniutinut 2022-mit 2024-mut aqutsisussanngornera nuannaarutigalugu Kalistat Lundip ilanngullugu oqaatigaa.

Nunat Avannarliit Ministeriisa Siunnersuisoqatigiiffiata Issittumi suleqatigiittoqarnissaanut suliniaqatigiiffia 1996-imi pilersinneqarpoq.
Nunanut Avannarlernut Suleqatigiinnermut Naalakkersuisut ukiumi qaangiuttumi ataatsimiinnerinut atatillugu isumaqatigiissutigineqarsimavoq nunat avannarliit Issittuanni suliffeqarfiup tamanut qinnuteqartitsinissat isumagineqarsinnaaqqullugit aqutsisutut isumaginnittuusinnaaneranut periarfissanik misissuisoqassasoq. Suleqatigiinnermut Naalakkersuisut aqutsineq Sverigemi Nordregio-mit nunatsinnut 2022-mi nuunneqassasoq ukioq manna aalajangerput.

- Nunat Avannarliit Siunnersuisoqatigiivisa maani Københavnimi ataatsimiinnerata peqataaffiginera pissanganarteqaara aammalu Suleqatigiinnermut Naalakkersuisunik allanik suleqatigisartagassannik naapitsinera nuannaarutigeqaara. Issittumi suleqatigiinnissamut pilersaarutip tamanit qinnuteqarfigineqarsinnaasup nunatsinnit allaffissornikkut 2022-mi aqunneqalersussanngornera nutaarsiassaavoq nuannaarutigisassaq. Taama Naalakkersuisoq Kalistat Lund oqarpoq.
NAPA, Kalaallit Nunaanni Nunat Avannarliit Illuutaat aamma Ilisimatusarfik allaffissornikkut aqutsisuussapput, Issittumilu suleqatigiinnissamut pilersaarutinut suliniutissanullu tunngatillugu qinnuteqartitsinermik ingerlataqassallutik. Oqartussat, suliffeqarfiit, ilisimatuut, NGO-t inuussutissarsiutinillu ingerlatsisut soorlu nipilersortitsinissaminnut aningaasanut qinnuteqarsinnaapput. 2022-mi qinnuteqaatinut 10 mio. kr. tapiissutigineqassapput.
- Nunatsinneersut, Nunanit Avannarlerneersut Issittumilu nunanit allaneersut periarfissaq atorluarlugu Issittumi suleqatigiinnissamut suliniutinut qinnuteqarluarnissaat neriuutigeqaara. Nunani Avannarlerni Issittoq pillugu suleqatigiittoqarnerani kalaallit nukittunerusumik inissisimanissaat nunatta pitsaasumik isigigaluaraa, akerlinganik programmip pingaaruteqassusaanik pitsanngorsaasoqarnissaa kissaatigineqarpoq, soorlu nunat avannarliit suleqatigiinneranni Issittup ineriartortitseqqiffiunissaanut tunngatillugu. Tamanna ajunngitsutut isigaara, nangilluni oqarpoq Nunani Avannarlerni Suleqatigiinnermut Naalakkersuisunngorlaaq Kalistat Lund.
Nunat Avannarliit Siunnersuisoqatigiiffiat Københavnimi novembarip ulluisa aallaqqaataaniit sisamaata tungaanut 2021-mi 73-issaannik naapeqatigiipput. Tassani qinikkat nunani avannarlerneersut Nunat Avannarliit Siunnersuisoqatigiiffiata ataatsimiinneranni peqataallutik. Ataatsimiinneq tassaavoq Nunani Avannarlerni qullersat ataatsimiinnerat aamma ukiumi nunani avannarlerni politikkikkut pisuni pingaarnersaasoq. Peqataasut akornanniipput Nunat Avannarliit Siunnersuisoqatigiivini ilaasortat Nalaakkersuisullu siulittaasui.

Naalakkersuisut Siulittaasuat Múte B. Egede ministeriunerit ataatsimiinneranni ukioq manna peqataavoq. Nunanut Avannarlernut Naalakkersuisoq Kalistat Lund Suleqatigiinnermut Naalakkersuisut ataatsimiinneranni, Nunat Avannarliit Siunnersuisoqatigiivisa Siulittaasoqarfiannik ataatsimeeqateqarnermi, nunat avannarliit killiit ataatsimiinnerani aamma nunanik namminersorfiusunik ataatsimeeqateqarnermi peqataavoq. Nunarput nunani avannarlerni nunanut allanut tunngasutigut ministerit ataatsimiinneranni atorfilittatigoorlugu ukioq manna peqataasoqarpoq. Nunat Avannarliit Siunnersuisoqatigiivini Siulittaasoqarfiup ministerillu arlallit saniatigut kalaallit inatsisartuini ilaasortat Sofia Geisler (IA) aamma Doris Jakobsen Jensen (S)
peqataapput.

Annertunerusumik paasisaqarusukkuit Nunalerinermut, Imminut Pilersornermut, Nukissiuutinut Avatangiisinullu Naalakkersuisup Kalistat Lundip allattaanut Nukaaka Tobiassenimut oqarasuaammut: 345603/580272 imaluunniit e-mail-mut: ntob@nanoq.gl -mut attaveqartoqarsinnaavutit, imaluunniit Nunanut Allanut Naalakkersuisoqarfimmi atorfilimmut, Upaluk Poppel-imut e-mail-ikkut: upap@nanoq.gl-mut saaffiginnissinnaallutit.