Qaleralinniarluni aalisarnermi aaqqissuusseqqittoqarnissaanik pisariaqartitsisoqarpoq

Aqutsiveqarfimmi 47-imi, Upernavik, Uummannaq aamma Qeqertarsuup tunuani sinerissap qanitaani qaleralinniarluni aalisarnermi tamaviaarutissaqartoqarpoq. Tamaviaarutissat ilagaat maannamut angallatit umiatsiaaqqallu akornanni agguaassisarnermut aaqqissuussisimanermut tunngavoq.

 

Inatsit maanna tunngavigineqartoq angallatinut umiatsiaaqqanullu pisassiinermi agguuaassisoqarnissaanik piumasaqaatitaqarpoq. Aalisarnermi immikkoortumut pisassanik pisariaqartitsisuusumut taamaallaat pisassiissutaasunik allannguisoqarsinnaanngilaq, angallatinullu atatillugu pisassiissutinik niuerutigineqarsinnaasunik pisassiissutinik peqartitsineq peqqutigalugu, immikkoortut akorngini pisasssiissutinik nuussinissaq periarfissaagani. Tamatuma kingunerisarpaa pisassiissutissat siunnersuinernut naleqqiullugu qaffasinnerungaartumut inissinneqartarneri tamakkiisumillu pisassiissutaasunut atorneqanngitsoornerannik kinguneqartartumik.

 

Inatsisit taamaatsillugit Naalakkersuisut allatut ajornartumik Upernavimmi pisassiissutinik qaffaassuteqartariaqarnerannik kinguneqarpoq, taamaasiortoqanngippat umiatsiaaqqamik aalisartut ukiup sinneranut aalisagassaqanngimmata. Pisassiissutit inatsit naapertorlugu angallatinut umiatsiaaqqanullu agguaassinissami najoqqutassaq malillugu qaffanneqartussaapput, umiatsiaaqqallu pisariaqartitaat aallaaviginagu.

 

Umiatsiaaqqat aalisaannarnissaat qulakkeerumallugu Naalakkersuisut aalajangerput pisassiissutit 900 tonsinik qaffallugit. Piumasaqaataavorli taamaallaat aalisarneq ningittakkanik aalisarluni ingerlanneqarnissaa tamatumalu kingunerivaa, ukiup sinneranut Upervimmi umiatsiaaqqanit qassutit atorlugit aalisartoqarsinnaannginnera. Pisassiissutit aappaagumut nuunneqarsinnaassanngillat.

 

Naalakkersuisut Aalisarneq pillugu Ataatsimiititaliarsuup isumaliuutissiissutaata naammassineqarnissaa utaqqisimavaat tamannalu peqqutigalugu inatsimmik allannguuteqartitsinissamik suliaqarnissaminnik periarfissaqarsimanatik. Naalakkersuisut qaqugukkulluunniit tulluartuusorinngilaat pisassiissutinik qaffaanissaq, isumaqarpulli inunnut pineqartunut akisussaassuseqanngitsumik Upernavimmi umiatsiaaqqamik aalisartunut taakkualu ilaqutaannut, ukiup sinneranut isertitassaqanngitsutut inissillugit qimarratigiinnarnissaat pissanngitsoq, inatsit pineqartoq allanngortinneqannginnera peqqutigiinnarlugu.

 

Maannamut inissisimaneq attanneqarsinnaanngilaq tamannalu aallaavigalugu

Naalakkersuisut ukiup tulliuttup ingerlanerani aalisartut susassaqartullu allat qanimut peqatigalugit suleqatiginerisigut aqutsinikkut allaffissornikkullu ingerlatseriaatsip aamma inatsisit qanoq aaqqiivigineqarnissaanik suliaqassallutik.

 

Januaarimi 2022-imi Aalisarnermut Piniarnermullu Naalakkersuisup avannaani aalisartut siunissami aalisarnerup aaqqissuunnissaanut oqaloqatiginerisigut isumasioqatigiissinneqarnissaannik aggersarniarpai. Isumasioqatigiinnermi ilaatigut Aalisarneq pillugu Ataatsimiititaliarsuup isumaliutissiissutaa eqqartorneqassaaq taakkualu tunngavigalugit siunissami nutaamik aalisarneq pillugu inatsimmut suliaqarnermut tunngaviussapput.

 

Upernavimmi pisassiissutinik qaffaassuteqarneq taamaammat inatsisit allanngortinneqarnissaanut suliniuteqarnermut atatillugu ikaarsaariarnertut isigineqassaaq.

 

 

Erseqqinnerusunik paasissutissat pillugit attaviguk:
katk@nanoq.gl