Takornariartitsinermik inuussutissarsiuteqartut aallartisaqqilerneranni ikiorsiissutit

Takornariartitsinermik inuussutissarsiuteqartut aallartisaqqilerneranni ikiorsiissutit, kiisalu Covid-19-ip atuunnerani ikiorsiissutinik aaqqissuussinerit atorunnaarsikkiartuaarneri

Covid-19-ip inuiaqatigiinnik eqquinerata kingornaniit ingerlaavartumik Covid-19-imut atatillugu suliniutinik aallartitsisarsimavugut, inuussutissarsiornermik ingerlatsisunut ikiorsiissutaasunik.

Aallussinerput minnerunngitsumik takornariartitsinermik inuussutissarsiortunut sammisimapput. Taamaattumillu Naalakkersuisut januari qaammat 2021 aallartsippaat ikiorsiissutinik aaqqissuussinerit taakkununngalu malittarisassat 31. oktober 2021-ip tungaanut atuuttut:
- Ajornartoortoqarnerani takornariartitsinermik inuussutissarsiutilinnut ikiorsiissutit, tamatumani aamma ajornartoornermi taarsigassarsisarneq
- Suliffeqarnermi ikiorsiissutit takornariartitsinermik inuussutissarsiortuni
- Takornariartitsinermik inuussutissarsiortut ingerlatsinerannut ikiorsiissutit

Naalakkersuisut aalajangersimapput piffissami 1. november 2021-imiit 31. december 2021 ilanngullugu aallartisaqqinnermut takornariartitsinermi inuussutissarsiortunut ikiorsiissutinik ingerlatsisoqassasoq, inuussutissarsiummut malittarisassartaqartunik. Aaqqissuussinerup imarisaasa assigaat takornariartitsinermi ajornartorsiortoqarnerani ikiorsiissutit, taamaattoq malunnaatilinnik allannguuteqartitsiviusunik, kajumissaarisumik Covid-19-ip qaangiunnerani niuernermi pissutsinut atuutilersunut naleqqussarnissamik. Ilaatigut annerpaamik qaammammut tapiissutaasinnaasut apparneqarput 100.000 kr.-inut.

Kissaatigineqarpoq inuussutissarsiortut maanna Covid-19-ip atuuffigiunnaagaanut pissutsinut ikiorsiissutitaqanngitsunut ukiumi nutaami naleqqussalernissaat. Angalanerit naatsorsuutigineqarsinnaanerulissapput akiuussutissanik kapitsittarnerit annertusiartuaartillugit. Isiginiarlugu inuiaqatigiit pissutsinut nalinginnaasunut ammariartulernerat Covid-19-imik ikiorsiissutinik aaqqissuussinerit tamarmik atorunnaarsinneqassapput, aallartisaqqilernermut ikiorsiissutit ukiup naanerani atorunnaarneri ilutigalugit.

Malittarisassat maanna atuuttut nassaarineqarsinnaapput uani www.big.gl.

Annerusumik paasisaqarusuttunut innersuussisoqarpoq Inuussutissarsiornermut Niuernermullu Naalakkersuisoqarfimmit, isiin@nanoq.gl.