Attaveqaqatigiinnermut pisortaq nutaaq

Irene Jeppson Namminersorlutik Oqartussani attaveqaqatigiinnermut pisortatut nutaatut atorfinitsinneqarpoq.
- Namminersorlutik Oqartussani attaveqaqatigiittarnermut tunngasut pitsanngorsaaffigerusuppagut taamaasillutalu ammanerusumik ingerlatsinissamik naalakkersuinikkut kissaatit ikorfartorneqartussanngorlutik. Akisussaaffiup pingaarutillip Irene Jeppsonimit inummit misilittagaqarlunilu saqqumilaartumit isumagineqartussanngornera nuannaarutigaara, taamak oqarpoq Siulittaasup Naalakkersuisoqarfiani pisortaq, Simigaq Broberg.
Irene Jeppson tusagassiortutut ukiorpassuarni sulisimavoq inuiaqatigiilerinermullu tunngasunik annertuumik ilisimasaqarluni. Tamatuma saniatigut suliffeqarfissuarni assigiinngitsuni atorfeqartarsimavoq kingullertullu Mittarfeqarfimmi attaveqaqatigiinnermut pisortatut atorfeqarsimalluni.
- Attaveqaqatigiittarnermut tunngasut ineriartortinnissaanut siuarsarnissaanullu sulinissara qilanaareqaara. Attaveqaateqarnermut tunngatillugu aaqqiissutissat pitsaasut sunniuteqarsinnaasullu ilaatigut ukkatariniarpakka Naalakkersuisullu suleqatigalugit inuiaqatigiinni saqqumilaarnerusumik suleqataanissara qilanaaralugu, Irene Jeppson oqarpoq.
Attaveqaqatigiinnermut pisortassaq novembarip aallaqqaataani Naalakkersuisut Siulittaasuata Naalakkersuisoqarfiani aallartissaaq.

Paasissutissat pillugit attaveqarfissaq: Uiloq Mathæussen, Tusagassiuisarnermut Siunnersorti, e-mail umat@nanoq.gl imaluunniit oqarasuaat +299 345128