Inuit innarluutillit tusaaneqarput - paquminartut paquminartinneqarunnaassapput

Isumasioqatigiinnermi ornigarneqarluartumi innarluutillit qanigisaallu Kalaallit Nunaanni innarluuteqarluni inuuneq pillugu oqaluttuarnissaminnut periarfissinneqarsimapput. Innarluuteqarneq suli paquminartuusoq, illuutitigut sinaakkutit pitsanngorsarneqarsinnaasut aamma suliffeqarfiit innarluutilinnut ammanerusariaqartut amerlasuut oqaatigaat.

Nuummi 18. aamma 19. oktobarimi ulluni marlunni isumasioqatigiinnermi peqataanissamut nuna tamakkerlugu innarluutilinnut qanigisaannullu peqatigiiffiit aggersarneqarsimapput. Tassani innarluutilinnut pissutsit pillugit isummaminnik anitsinissaminnut periarfissaqarlutik.

Siunissami innarluutilinnut politikki Innarluutillit pisinnaatitaaffii pillugit Naalagaaffiit Peqatigiit isumaqatigiissutaat Kalaallit Nunaanni qanoq annertutigisumik malinneqarnera pillugu Naalakkersuisut maanna nassuiaammik suliaqarnerat tunngaviuvoq. Naalakkersuisut pissutsit sumi ajunnginnersut suullu amigaataanersut pillugit tamakkiisumik isiginninnissaminnik kissaateqarput. Nassuiaat siunissami innarluutilinnut politikkimut tunngaviussaaq.

Meeqqanut, Inuusuttunut Ilaqutariinnullu Naalakkersuisoq Paneeraq Olsen peqataasimavoq, innarluuteqarlunilu inuuneq pillugu peqataasut saqqummiinerannut assut attortissimavoq:
- Innarluutillit tusaassagivut pingaaruteqarpoq aamma ajornartorsiutit piusut ammasumik oqaluuserisinnaassagivut pingaaruteqarpoq. Paquminartuusussaanngittariaqarpoq.

- Inuiaqatigiinnitsinni innarluuteqartunut tikikkuminartuunissarput akuutitsinerunissarpullu Naalakkersuisuni sulissutigaarput, Paneeraq Olsen oqarpoq nangillunilu:

- Tamannami tamatsinnut suliassaqarfinnilu tamanik attuivoq, Naalakkersuisuniillu oqartussaasoqarfiit assigiinngitsut akimorlugit sulissaagut, siunissamilu innarluutilinnut politikkissamut aalajangersaalerutta kommunit qanimut suleqatigissavagut.
Ilinniartitaaneq, inissiat aamma suliffeqarneq Ulluunerani paaqqinnittarfinni sulisut ilinniartitsisullu innarluutillit pillugit ilisimasaat annikippallaarput, isumasioqatigiinnermi peqataasut ilaatigut tikkuarpaat. Inissiat amerlasuut ima aaqqissuunneqarsimapput, innarluutilinnut tulluarsagaanatik. Aamma innarluutillit suliffeqarfinni sulilerusuttut sulilernissartik ajornakusoortittarpaat. Innarluuteqarneq aporfiusariaqanngitsoq isumasioqatigiinnermi peqataasut oqaatigaat.

Innarluutilik paasinnilluni ammallunilu naapikkaanni, suliffimmi annertuumik isumalluutaallualersinnaavoq. Taamaattumik - innarluutillit inuiaqatigiinni peqataanissaat piviusumik periarfissaqassappat, arlallit innarluuteqarneq pillugu ilisimasaqarnerulertariaqarput – paquminartup paquminartikkunnaarnissaa pingaaruteqarpoq.

Sukumiinerusumik paasissutissat pillugit naalakkersuisup allattaa Inûna Davidsen attavigiuk, e-mail: inda@nanoq.gl imaluunniit oqa. + 299 25 78 54