KNR-ip 2021-mi oktobarip 13-iani nutaarsiassiineranut akissut

Iluarsartuussinermut Aqutsisoqarfimmik pilersitsinissap taamaatinneqarnissaanik Siumup siunnersuutaa pillugu KNR-ip 2021-mi oktobarip 13-iani nutaarsiassiineranut akissut

2022-mut Aningaasanut Inatsisissatut Siunnersuummut ilaatinneqarluni Iluarsartuussinermut Aqutsisoqarfimmik pilersitsinissap taamaatinneqarnissaanik Siumup siunnersuutaa pillugu ilanngutassiaq, pingasunngornermi oktobarip 13-iani www.knr.gl-imi atuarneqarsinnaavoq.

Jess Svanep KNR-imut oqaatigaa, atuisut allaffissornermut sooq akiliuteqaqqissasut Siumup paasisinnaangikkaa, Namminersorlutik Oqartussallu inissiaataannik iluarsartugassanik nakkutilliinermi aqutsisoqarfittaaq marloqiusamik allaffissornermik kinguneqassasoq. Politikeri naapertorlugu allaffissorneq tamanna Namminersorlutik Oqartussat inissiaatileqatigiiffiutaanni INI A/S-imeereerpoq.

Namminersorlutik Oqartussat inissiaataannik iluarsartuussinerit aserfallatsaaliinerillu annersaat INI A/S-ip isumagisarimmagit ilumoorpoq. Namminersorlutik Oqartussat najugaqarfiutaat sinnerlugit suliassaq tamanna INI A/S-ip isumagisaraa.

Tamatuma saniatigut aningaasanut inatsimmi ilaatinneqarlutik ineqarnermut immikkoortumi nutartigassanik, aserfallatsaaliugassanik, ingutsigassanillu isumagisaqartunik INI A/S-imi sulisoqarnikuuvoq. Tamanna sanatitsisutut oqartussaanertut aamma ilisimaneqarpoq. Sanatitsisutut oqartussanut aningaasartuutit aningaasanut inatsimmi suliat aqqutigalugit aningaasartuutigineqartarput. Tassa taanna allaffissorneq INI A/S-imit Namminersorlutik Oqartussanut nuunneqaannarpoq.

Naalakkersuisut 2021-mi aalajangerput, Namminersorlutik Oqartussani sanatitsisutut oqartussaasut qitiusumut inissinneqassasut. Namminersorlutik Oqartussani sanatitsisutut oqartussaasut pitsaanerusumik, ukkatarinninnerusumillu ukkatarineqarnissaat siunertarineqarpoq. Naalakkersuisut nutaat aalajangiinermut tapersiipput, aalajangiinerlu eqqortuullunilu pingaaruteqartuuneranut isumaqataallutik.

Siumup Naalakkersuisunut kaammattuutigaa, ineqarnermut akiliutit qaffaatissaattut akuerineqartut konto pingaarnermit pineqartumit aaneqassasut, pilersaarutaasumillu allaffissornerulernissaq taamaatinneqarluni.

Taamaakkaluartoq sulisooreersut nuutsinneqarmata, sanatitsisutut oqartussaasut qitiusumut inissinneqarnerat allaffissornerunermik kinguneqanngimmat ersarissassallugu pingaaruteqarpoq. Atorfiit atorunnaarsinneqassappata ineqarnermut, isumaginninnermut, ilinniartitaanermut umiarsualiveqarnermullu immikkoortortat iluini nutartigassat, aserfallatsaaliugassat, ingutsigassallu suliarineqarnissaat ajornarsissammat, atorfiit atorunnaarsinneqarnissaat Naalakkersuisut piviusorsiorpalaartutut isiginngilaat.

Naaja H. Nathanielsenip oqaatigaa: ”Ineqarnermut akiliutit nuannaarutigalugu qaffanneqanngillat. Inatsit naapertorlugu, aammali ukiorpassuarni aserfallatsaaliisoqartarsimannginneratigut ajoraluartumik pinngitsoorneqarsinnaanngilaq. Suliaq Naalakkersuisunut oqitsuinnaanngilaq, nunatsinnili attartortunut ineqarnikkut atugassarititaasut pitsanngorsarneqarnissaat siunnerfilimmik sulissutigalugu. Suliassaq ukiorpaalunni suliarineqartussaavoq, tamannali tunuarsimaassutiginngilarput. Ajoqusertut killilersimaarniarlugit massakkut iliuuseqartoqassaaq. Aserfallatsaaliinissami kinguaattoorutit ullormut 500.000 koruuninik qaffattarput, taamaattumillu iliuuseqarfigineqartariaqarluni.”

Annertunerusumik paasisaqarusunnermi Ineqarnermut, Attaveqaasersuutinut Naligiissitaanermullu Naalakkersuisoqarfik attaveqarfigineqassaaq, uunga box909@nanoq.gl