Peqqinnissaqarfimmut atatillugu ajornannginnerusumik naammagittaalliuuteqarnissamut taarsiivigineqarnissamullu qinnuteqartarneq

Peqqinnissakkut katsorsartinnermut, peqqinnissaqarfimmi sullisinermut aamma taarsiiffigineqarnissamut qinnuteqarnermut atatillugu innuttaasunut ajornannginnerusumik naammagittaalliortarfik nutaaq nittartakkatigut sullisivik.gl aqqutigalugu saaffigineqarsinnaanngorpoq. 

 

Siornatigut innuttaasut Nunatta Nakorsaaneqarfianut, Peqqinnissaqarfimmut imaluunniit Peqqissutsimut Naalakkersuisoqarfimmut saaffiginnittarnikuusimapput peqqinnissakkut katsorsartinneq, sullissineq imaluunniit taarsiivigineqarusunneq apeqqutaatillugit. Naammagittaalliortarfik nutaaq innuttaasut ataatsimoortumik naammagittaalliorusunnermi imaluunniit taarsiivigineqarusunnermi saaffiginnittarfeqalersinnaanerannut qulakkiisuuvoq.

 

- Nakorsamik oqaluussinermi imaluunniit katsorsartinnermi kukkusoqarnerani paatsoortoqarneranulluunniit atatillugu soorunami naammagittaaliortoqarnissamut periarfissaqassaaq.   Taamaattumik nuannaarutigaara innuttaasut maanna ajornannginnerusumik naammagittaalliuuteqarsinnaanerat peqqinnissamut Naalakkersuisoq Kirsten L. Fencker, oqarpoq. 

 

Sullissivik aqqutigalugu naammagittaalliuuteqarfimmut imaluunniit taarsiivigitinneqarnissamut immersuisoqarsinnaavoq. Immersugassaq naammassippat Sullissivik aqqutigalugu suliassanngortinneqassaaq. Innuttaasunut NemID-qanngitsunut naammagittaalliuutertik emailikkut imaluunniit allakkatigut nassiunneqarnissaa suli periarfissaavoq. Arlaatigut Sullissivik aqqutigalugu naammagittaalliornissamut imaluunniit taarsiivigitikkumalluni qinnuteqarniarnermi ajornartorsiuteqartoqartillugu, kommunimi innuttaasunut sullissivimmi ikiortittoqarsinnaavoq.

 

Peqqinnissakkut katsorsartinnermut atatillugu naammagittaalliuut, pisortatigut peqqinnissaqarfimmiit avataaniillu sulisunit suliarineqarsimasut pineqartarput. Peqqinnissaqarfimmi sullissinerit pillugit naammagittaalliuut pisortatigut peqqinnissaqarfimmut attuumassuteqartarput. Katsorsartinnermut atatillugu taamaallaat pisortatigut peqqinnissaqarfimmi peqqinnissakkut allagartalinnit suliarineqarsimasunit naammagittaalliuteqarnermi taarsiivigitinnissamut qinnuteqartoqarsinnaavoq.  Nunatta Nakorsaaneqarfiata katsorsartinneqarsimasunit naammagittaalliuutit suliassanngorteqqillugit ingerlatissavai. Naammagittaalliornissamut taarsiivigineqarnissamullu qinnuteqaatit pillugit sukumiinerusumik paasissutissat Sullissivik.gl aqqutigalugu atuarneqarsinnaapput – una tooruk imaluunniit Nunatta Nakorsaaneqarfiata nittartagaani – una tooruk.

 

Katsorsartinnerit, sullissinerit pillugit apeqqutissaqartilluni imaluunniit naammagittaalliornissamut eqqarsaatersuuteqarnermi peqqinnissaqarfimmi napparsimasunut siunnersorti attaveqarfiginissaa innersuunneqarsinnaavoq. Periarfissat pisinnaatitaaffiillu pillugit sukumiinerusumik paasisaqartoqarsinnaavoq Peqqinnissaqarfimmi napparsimasunut siunnersorti ulluinnarni nal. 8:00 aamma 16:00 nalaani saaffigineratigut. Tamatuma kingorna naammagittaalliuummik nassiussisoqartariaqarnersoq paasineqarumaarpoq. Peqqinnissaqarfimmi napparsimasunut siunnersortimut paasissutissat allat peqqik.gl aqqutigalugu atuarneqarsinnaapput – una tooruk.

 

 

Sukumiinerusumik paasisaqarnerorusukkuit Peqqissutsimut Naalakkersuisoqarfik ugguuna attavigiuk PN@nanoq.gl