Naalakkersuisup timersoqatigiiffiit qinnuteqarsinnaaneranik periarfissikkai

Naalakkersuisut matumuuna nalunaarutigissavaat, Eqqumiitsuliortunut timersornermik aaqqissuussanut angalanermut aningaasartuutinut tapiissutinut timersoqatigiiffiit qinnuteqarsinnaanerat ammaaffigineqartoq.

Maannamut, aningaasaliissutit qinnuteqaatinik suliaqarneq piffinni aalajangersimasuni pisaraluarpoq; 15. januar, 1. maj aamma 1. september. Maannalu, periarfissaalerpoq, 31. Oktober 2021 killeralugu, timersoqatigiiffiit qinnuteqarsinnaanerat.

Covid-19-ip kingunerisaanik, qinnuteqartartorpassuit qinnuteqarnissamut periarfissatik annaavaat. Isiginnaartitsisartut, nipilersortartut, qitittartut, filmiliortartut, atuakkiortut eqqumiitsuliortullu tatisimaneqangaatsiarput, Covid-19 peqqutigalugu aaqqissuussat, isiginnaagassiat, saqqummersitsinerit, katersugaasiviit, filminik saqqummersitsinerit kiisalu appisimaartarfiit nuna tamakkerlugu matuneqarmata.

Timersoqatigiiffinnut Kalaallit Nunaanni Timersoqatigiit Kattuffiannut ilaasortaasunut qinnuteqartoqareerneratigut tapiissuteqartoqarsinnaavoq, tapiissutillu aqqutigalugit eqqumiitsuliortut ammaanersiornernut allatullu timersornikkut aaqqissuussanut angalanerannut aningaasartuutit akilerneqassapput.
Kultureqarnermut Naalakkersuisup, Peter P. Olsenip, timersoqatigiiffinnut, eqqumiitsuliortut peqatigalugit aaqqissuiniartut, periarfissippai, 31. Oktober 2021 tungaanut qinnuteqarsinnaanissaanik. Tapiissutinik tunniussinissamut malittarisassat atuuttut sinneri suli atuupput.

Eqqumiitsuliortunut timersornermik aaqqissuussanut angalanermut aningaasartuutinut tapiissutinut paasissutissat, qinnuteqarnermilu immersugassaq www.sullissivik.gl –imi nassaarineqarsinnaapput.

Paasisaqarnerorusukkuit Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik ugguuna attavigineqassaaq iktin@nanoq.gl