Aqutsiveqarfik Ittoqqortoormiinut, Tasiilamut aamma Qaanaamut qilalukkanik qernertanik immikkut pisassiissuteqarneq

Naalakkersuisut oktobarip 11-anni 2021-mi aalajangiipput aqutsiveqarfik Ittoq-qortoormiinut tallimanik, aqutsiveqarfik Tasiilamut 15-inik kiisalu aqutsiveqarfik Qaanaamut 20-nik immikkut qilalukkanik qernertanik pisassiisoqassasoq.

Qernertanut immikkut pisassiissutigineqartut tamarmik piniaqatigiinnikkut taa-maallaat piniarneqarsinnaapput. Aqutsiveqarfik Tasiilamut immikkut pisassiissu-tigineqartunit tallimat aamma aqutsiveqarfik Qaanaamut immikkut pisassiis-sutigineqartunit tallimat, aqutsiveqarfiit nunaqarfiinut agguaanneqassapput.

Kommuneqarfik Sermersuumi Ittoqqortoormiini aamma Tasiilami immikkut pisassiissutigineqartut tallimat aamma 15-it qinnuteqarsimasut akornanni makitsinikkut agguaanneqarnissaat piumasaqaataavoq. Avannaata Kommuniata Qaanaami aammattaaq immikkut pisassiissutigineqartut 20-t qinnuteqarsimasut akornanni makitsinikkut agguaatissavai. Kommunit pineqartut Tasiilami aamma Qaanaami qulakkiissavaat inuussutissarsiutigalugu piniartut tunngaviusumik pisassiissutit nungunneranni qilalukkanik qernertanik pisaqanngitsoorsimasut makitsinermi salliutissallugit.

Naalakkersuisoqarfiup Kommuneqarfik Sermersuumi Ittoqqortoormiini aamma Tasiilami, kiisalu Avannaata Kommuniani Qaanaami piumaffigai periarfissaq siulleq atorlugu immikkut pisassiissutit qanoq agguarneqarsimaneri nalunaarutigissagaat.

APN-imit erseqqissaatigineqassaaq immikkut pisassiissutiniit pisarinngitsuukkat ukiup tullianut pisassanut nuunneqarsinnaassanngimmata. Pisassat sipporlugit pisaqartoqarpat pineqartut aappaaguani pisassanit ilanngaatigineqassapput.

Qernertartassanik immikkut pisassiisaqattaartarnerit pinaveersaarniarlugit, Naalakkersuisut siunissamut ungasinnerusumut aaqqiissutissanik isumaliuu-teqarlutik sulisssutigaat.

Naalakkersuisut aamma sulissutigaat piniarneq aallaaniarnerlu pillugit inatsimmi kulturikkut pisassiissutissanik aalajangiinissamut tunngaviliinissaq. Tassunga siunnersuut inatsissamut allannguutissamut suliarineqareerpoq.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl