´A/S INI-p aammalu Illuut A/S-ip akinik qaffaaniarnera unitsilli’ pillugu SIK-p tusagassiorfinnut nalunaarutaanut akissut

Namminersorlutik Oqartussat najugaqarfiisa ilaanni ineqarnermut akiliutit qaffattussaanerinut atatillugu SIK-p tusagassiorfinnut nalunaarutaa tunuliaqutaralugu, Naalakkersuisoq Naaja H. Nathanielsen ima oqaaseqarpoq:

”Siunissami ulluminut naleqquttunik, silaannarissunik nukinnillu atuivallaanngitsunik, pitsaasunillu innuttaasunut ineqartitsinissaq pillugu ersarissumik, siunissamullu ungasinnerusumut isigisumik ineqarnermut politikkeqarnissaq Naalakkersuisut sulissutigaat.’’

Ineqarneq akeqarpoq. Ineqarnermut akiliutit ukiumut naleqqussarneqarneq ajorunik, inuiaqatigiinni nalinginnaasumik akitigut ineriartornernut najugaqarfinni isertitat malinnaasinnaajunnaassapput. Taamaalilluni ingerlatsineq, aserfallatsaaliinissarlu missingersuusiarineqarsinnaassanngillat. Taamaattoqarneratigut nukingernartumik aserfallatsaaliinissamut aningaasartuuteqartoqartariaqarpoq, inissiallu aserfallakkiartuinnassallutik.

Naalakkersuisoq Naaja H. Nathanielsen ima oqaaseqarpoq: ”Akerleriittutut nipeqarsinnaagaluarpalluunniit, ineqarnermut akiliutinik naleqqussaasoqartillugu attartortut atugarissaarnissaat ukkatarineqarpoq. Namminersorlutik Oqartussat najugaqarfiini arfineq-marluusuni ineqarnermut akiliutit naleqqussarneqarnerisigut, najugaqarfinni ingerlatsinermut aserfallatsaaliinermullu akiliisinnaassuseqarnissaq qulakkeerneqassaaq.”

Naalakkersuisut aalajangerpaat, Namminersorlutik Oqartussat najugaqarfiisa aserfallakkaluttuinnarnissaat pinngitsoortikkumallugu, ineqarnermut akiliutit 2023-mi januaarip aallaqqaataa aallarnerfigalugu ukiut tamaasa akinut iluarsiilluni naleqqussarneqartalissasut.

Naalakkersuisoq Naaja H. Nathanielsen ima oqaaseqarpoq:

”Ineqarnermut akiliutit qaffanneri tusarliutissallugit nuannertuaannarneq ajorpoq, politikkikkulli aqutsisuugaanni aalajangigassat imaannaanngitsut aamma aalajangigassaasarput. Inissiaatigut ineqarfigisinnaaqqullugit inissiat aserfallatsaalineqartarnissaat, inissianillu ingerlatsineq qulakkiissallugit, Naalakkersuisut akisussaaffimmik tigusipput. Inissiat ukiut 25-t atoreersullu, aserfallatsaalineqartarsimannginnerat patsisaalluni ingutserneqassagunik akisuallaassaqaaq. Taamaattumik iliuuseqartoqartariaqarpoq”.

Ineqarnermut tapiissutit
Attartortut isertitaat allanngorsimatillugit, inoqutigiit ineqarnermut tapiiffigineqarsinnaatitaasinnaapput, ineqarnermulluunniit tapiissutisiarisartagaat naleqqussarneqarsinnaatitaallutik. Taamaattoqartillugu attartortut najukkaminni innuttaasunut sullissivimmut imaluunniit nunaqarfimmi allaffimmut saaffiginnissapput imaluunniit www.sullissivik.gl-imi nammineerlutik immersuissallutik.

Ineqarnermut immikkoortumut Naalakkersuisut aaqqissuusseqqinnerisigut, Ineqarnermut immikkoortumut tamakkiisumik pilersaarut, pisortat attartortittagaataanni ineqarnermut akiliutit imminut nammassinnaasumik ineriartortinneqassapput. Sulinermi tassani appasissumik isertitallit immikkut ukkatarineqarput, taamaattumillu Isumaginninnermut Sulisoqarnermullu Naalakkersuisoqarfik qanimut suleqatigineqarluni.

Annertunerusumik paasisaqarusunnermi Ineqarnermut, Attaveqaasersuutinut Naligiissitaanermullu Naalakkersuisoqarfik attaveqarfigineqassaaq, uunga box909@nanoq.gl