Nuna tamakkerlugu puigortunngorneq pillugu ataatsimiinneq

2021-mi novemberip 23.– 24- anni Ilulissani nunatsinni pisortaqarfiit, suliffeqarfiit aamma suliamik ilisimasallit Nuna tamakkerlugu 2021-mi puigortunngortut pillugit ataatsimeeqataanermi peqataassapput. Siunertaavoq puigortunngorneq pillugu suliniutit, periutsit misilittakkallu eqqartorneqarnissaat.

“Puigortunngortoqartillugu ilaqutaasut qanigisaasullu aamma eqqugaasarput. Taamaammat puigortunngortarnerup ukkatarinissaa naalakkersuisut pingaartippaat. Ataatsimiinnermi peqataasut pissarsiaat puigortunngortut qanigisaasullumi atugaannik pitsaanerulersitsinissamik kinguneqarnissaat neriuutigaara”, Peqqissutsimut naalakkersuisoq, Kirsten Fencker oqarpoq.

Ilisimatusarnermi – aamma ineriartornermi suliniut Arktisk Aldring, Isumaginninnermut Sulisoqarnermullu Naalakkersuisoqarfik aamma Peqqissutsimut Naalakkersuisoqarfik peqatigalugit puigortunngorneq ukkatarinerulernissaannut suleqatigiilerput. Novemberip 23-anni sulisut ilinniartinneqassapput 24-annilu ataatsimiisitsisoqassaaq.

”Nunatsinni puigortunngortut amerliartorput aamma innuttaasut amerlasuut puigortunngorneq inuunerminni qanimut misigaat. Taamaattumik nuannaarutigaara nappaat tamanna ukkatarineruleratsigut, taamaasilluni puigortunngortut ilaqutaalu piffissami artornartorfiusumi tapersersorneqarneq eqqortoq pisariaqartorlu pissarsiarisinnaalerniassammassuk” taama oqarpoq Isumaginninnermut Sulisoqarnermut, Meeqqanut Inuusuttunut, Ilaqutariinnullu Naalakkersuisoq, Mimi Karlsen.

Puigortunngorneq pillugu ataatsimiinnermi saqqummiussisoqassaaq, taamaaliornikkut puigortunngornermi ilisimatusarneq paasisaqarfigineqarnerulissaaq puigortunngortullu isumagineqarneranni ulluinnarni sakkussaasinnaasut sammineqassapput. Ilinniartitsisut aamma saqqummiisut nunatsinneersuulluutillu Danmarkimeersuupput. Qulequttat soorlu misissuinerit, suussusiinerit, puigortunngortut assigiinngissusaat, inuummarissaanermi suliat, nipilersornikkut peqqissaaneq aamma Nunatsinni puigortunngortunik suliaqarnerup aaqqissorneqarnera ataqatigiissarneqarneralu qulajaarneqassapput.

Nunatsinni nunarsuarmilu puigortunngortut amerliartorput. Innuttaasut ukioqqortusiartorneranni puigortunngortut amerliartortut paasineqarput. Taamaasilluni ullumikkut inuit amerlanerit angerlarsimaffimminni aamma nunagisami utoqqarni paaqqutarinnittarfinni amerlapput. Tamanna kommunini, peqqinnissaqarfinni aamma qanigisaasuniit equmaffigineqaleraluttuinnarpoq, taamaaliornikkullu puigortunngortut pitsaanerpaamik paaqqutarineqarsinnaalissapput nakorsarneqarsinnaalissallutillu.

Paasisaqarnerorusukkuit naalakkersuisup allattaa Kirsten Nystrup kirn@nanoq.gl imaluunniit oqar. 346690 aqqutigalugit attavigiuk.