Inunnut innarluutilinnut digitalikkut oqaloqatigiinneq naligiimmik periarfissinneqarnissamut aqqutaasinnaavoq

Ukioq manna inunnut innarluutilinnut sapaatip akunnerutinneqartumi 41-mi qulequttat “tikikkuminassuseq – inooqatigiinnermi digitalikkullu” ukkatarineqassapput. Uani aporfiit piiarneqarnissaat pineqassaaq, taamaalilluni inuit innarluutillit allat assigalugit periarfissaqartinneqarnissaat pineqarpoq. Periarfissat “tikikkuminartuussapput”. Maanna aaqqissuussinernut aningaasannik qinnuteqartoqarsinnaanngorpoq.

Helga Jakobsen 46-nik ukiulik inunnguutsiminik cerebral pareseqarpoq, taanna aamma qaratsamit pisumit nukillaaqqanermik taaneqartarpoq. Ulluinnarni timikkut innarluuteqarnerup kingunerisaanik periarfissat killeqarnerat unammilligassallu Helgap nalunngilai. Kisianni unammilligassarpassuit Helgap qaangersinnaasimavai.

Pisiniarfinni tuniniaasutut Helga ilinniakkaminik ingerlatsivoq Nuummilu kollegiami najugaqarluni. Tassani najugaqatini ajornanngitsumik attaveqarfigisarpai. Amerlanertigut inimi ataatsimoorfiusumi nereqatigiittarput, aamma tassani ataatsimooqatigiinnut ilaavoq. Kisianni digitalikkut attaveqaqatigiinneq Helgap ikinnguteqarneranut ikinngutiminillu attaveqaannarnissaanut aamma pingaaruteqarpoq.

Chat atorlugu naapittarfitsigut attaveqarneq
Helgap ikinngutiminik ilaquttaminillu oqaloqateqaraangami chattikkut oqallifiit annertuumik atortarpai. Innarluutip timikkut attaveqarneq ajornakusoortittarmagu taamaaliornera Helgap silarsuaanik annertusititsisarpoq:
“Chattikkut ikinngutinnut allanneq uannut ajornanngitsuuvoq. Chatterneq aamma video atorlugu sianernermit ajornannginneruvoq, aamma ikinngutinnut attaveqarnissara uannut pingaaruteqarpoq. Kisianni anaanaga oqaluukkaangakku suli oqarasuaat nalinginnaasoq atortarpara”, Helga illariarpoq.

Digitali atorlugu ilinniartitsineq
Ilinniartitaanerup digitali atorlugu malinnaaffigisinnaanerata periarfissanngornissaa Helgap neriuutigaa. Tamanna Helgamut annertuumik iluaqutaassaaq – pingaartumik massakkut, tassami qatiggamigut pilatsinnini pissutigalugu napparsimalluni sulinngiffeqarallarpoq.

Timitalimmik tikinneqarsinnaaneq
Ulluinnarni Helga nammineerluni pisiniarfilerisarpoq aamma busserluni Niuernermik Ilinniarfiliartarluni. Pilatsereernermi kingorna nutaatut nutaamik rollatorertaarsimavoq. “Timitalimmik tikinneqarsinnaanini” Helgap oqaatigilluaannarlugu pigiinnarpaa. Rollatorip atornissaa niuerniarnermini ingammik pisariaqartippaa, aamma apisumi aqquserngillu quasartillugit qanoq innissaa pissanngatigalugu.

Inuit innarluutillit tusarnaarsigit
“Inuit innarluutillit tusarnaassavagut. Tassami innarluutigineqartut assigiinngitsut inuunermi assigiinngitsunik killissaqartitsipput. Taamaammat inunnut innarluutilinnut pitsaanerusumik inuunerminni periarfissinneqarnissaat innuttaagutta kommuniugutta kattuffiiguttalu peqatigiilluta sulissutigissavarput. Aaqqiissutissat nassaarineqassapput, taamaalilluni akummiffiit akummiffiujunnaarniassammata – imaluunniit ajornannginnerusumik qaangerneqarsinnaaniassammata. Tamanna tassaavoq ukioq manna inunnut innarluutilinnut sapaatip akunneqartitsinermi pineqartussaq”, Paneeraq Olsen Meeqqanut, Inuusuttunut, Ilaqutariinnullu nutaatut Naalakkersuisunngortoq oqarpoq.

Aningaasat massakkut qinnutigineqarsinnaanngorput
Nunami tamarmi inunnut innarluutilinnut sapaatip akunneqartitsineq sapaatip akunnerani 41-mi pissaaq. Sammisamut “Tikikkuminassuseq – inooqatigiinnermi digitalikkullu” tunngassuteqartunut nammineq kajumissutsiminnik suleqataasut suliniaqatigiiffiillu namminersortut kiisalu kommunit aaqqissuussinissaminnut aningaasanik massakkut qinnuteqarsinnaanngorput. Qinnuteqarfissaq kingulleq tassaavoq 7. oktobari 2021 nalunaaqutaq 12.00. Isumaginninnermi Aqutsisoqarfiup nittartagaani qinnuteqarfissaq nanissavat.

Paasisaqarnerorusukkuit attavigiuk Julia Lynge Ezekiassen email-ikkut : jeze@nanoq.gl imaluunniit oqarasuaat + 299 25 78 54 atorlugu.