Aalisarnermut atortut katatat ukiumut 60 mio. koruunit tungaannut aalisakkanik pisaqartarnerat ingerlaannartarpoq

Naalakkersuisut aalisarnermut, piniarnermut aallaaniarnermullu atortut katatat qimaannakkallu ajornartorsiutaanerannik misissuinermik suliaqarput.
Aalisarnermut atortut nunatsinni ukiumut 60 mio. koruunit tungaannut aalisakkanik pisaqartarnerat ingerlaannartartoq missingersorneqarpoq.

Aalisarnermut, piniarnermut aallaaniarnermullu atortut katatat qimaannakkallu nunarsuaq tamakkerlugu avatangiisinut ajornartorsiutaapput. Ajornartorsiut nutaajunngilaq, kisianni nunarsuup ilaani aalajangersimasuni tamanna ersarissiartuinnarpoq – aamma maani nunatsinni. Ersarissuunerisa ajornartorsiut ukkatarineqarnerulersippaa, kisianni atortut annertuut suli takuneqarsinnaanngillat, pissutigalugu taakkua immap naqqaniimmata.

 

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup Kalaallit Nunaanni aalisarnermut, piniarnermut aallaaniarnermullu atortut katatat qimaannakkallu ajornartorsiutaanerannik misissuineq suliaraa. Misissuinermi missingersorneqarpoq aalisarnermut atortut annaaneqarsimasut taakkua ukiumut 60 mio. koruunit tungaannut aalisakkanik pisaqartarnerat ingerlaannartartoq.

 

-          Aalisarnermut, piniarnermut aallaaniarnermullu atortut katatat qimaannakkallu ajornartorsiutaanerannut ataatsimoorluta iliuuseqarnissarput pingaaruteqarpoq. Avatangiisinut aningaasaateqarfikkoortumik saliinermik suliniuteqarnerit tapersiivigineqarnissaat ukiuni kingullerni aallunneqarsimavoq, tassani atortut katatat qimaannakkallu qaqinneqartarsimallutik. Qujanartumik aamma akisussaaffimmik tigusinissaq namminerlu saliisarnissaq aallunneqarnerulersimasoq maluginiarparput, taama Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Misissuinerup takutippaa aalisarnermut atortunik annaanneqarsimasunik qalluilluni saliineq akisuujusoq. Taamatullu taakkua nassaariuminaassinnaapput, tassami ilulissat imaluunniit immap sarfarnerata atortut nassatarisinnaasarmasigit. Misissuinermi missingersorneqarpoq qalluilluni saliinermut aningaasartuutit ataatsimut katillugit 30 mio. koruunik annertussuseqartut.

 

-          Naalakkersuisut pinngortitap paarineqarnissaa pingaartippaat. Nunarsuarmi nunatut minguinnerpaanissaq anguniagaraarput. Tamatta akisussaaffimmik tigusigutta tamanna aatsaat iluatsissinnaavoq. Aalisartut peqatigalugit ajornartorsiut qanoq iliuuseqarfigisinnaanerlutigu misissortariaqarparput, Naalakkersuisoq Kalistat Lund oqarpoq.

 

Misissuineq suliniutissanut siunnersuutinik arlalinnik, ajornartorsiummik iluarseeqataasinnaasunik imaqarpoq. Siunnersuutit taakkua ilagaat aalisarnermut atortunik utertitassanngortitsisarnermik atuutsitsilernissaq, taamaalilluni atortut atorunnaakkat tunniunnissaannut imaluunniit atortut annaanneqartut katersorneqarnerannut ikiuunnissamut kajumissaaruteqassalluni. Kiisalu utertitassat sinneruttut qassutinik annaaneqarsimasunik saliinerup aningaasalersorneqarneranut atorneqarsinnaassapput.

 

Suliniutissanut pilersaarut aammalu suliniutissanut siunnersuutit ataasiakkaat 23-t pillugit allaaserisat uani atuarneqarsinnaapput.

 

Attaveqarfissaq

Paasissutissanik annertunerusunik piniarnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisoqarfimmut pisortaaneq Mette Skarregaard Pedersen oqarasuaammut: 346476/529844 imaluunniit e-mail: mesp@nanoq.gl imaluunniit pan@nanoq.gl-mut attaveqarfigineqarsinnaavoq.