Nuummi ininut tamanit orninneqarsinnaasunut isernissamut akiuussutissamik kapitissimanissaq imaluunniit tunillatsissimannginnermut uppernarsaateqarnissamut piumasaqaat ingerlaannassaaq

Nuummi neriniartarfiliarniaruit, filmertarfiliarniaruit, timigissartarfiliarniaruit katersugaasiviliarniaruilluunniit tamakkiisumik kapitissimanissaq imaluunniit coronamik tunillatsissimannginnermut uppernarsaammik sivisunerpaamik nal. ak. 48-nik pisoqaassusilimmik peqarnissat suli piumasaqaataavoq. Taamaattorli piumasaqaat Sisimiuni 1. oktober 2021-miit atorunnaarpoq.

Maleruagassat nutaat tallimanngornermi 1. oktobarimiit sapaat 31. oktobari ilanngullugu atuutissapput.

Tamakkiisumik kapitissimaguit imaluunniit coronamik tunillatsissimannginnermut uppernarsaammik sivisunerpaamik nal. ak. 48-nik pisoqaassusilimmik peqaruit sumiiffinnut ukununnga ornigussinnaavutit:
  • Neriniartarfiit, kaffisorniartarfiit, imerniartarfiit, diskotekit assigisaallu, kiisalu taakku silataat.
  • Kulturikkut sullissiviit: kulturip illorsuit, filmertarfiit, katersugaasiviit, saqqummersitsiviit assigisaallu.
  • Innuttaasut illui assigisaallu.
  • Atuakkanik atorniartarfiit.
  • Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit isikkamillu arsaattarfiit.
  • Nujalerisut, tagiartuisartut, pinnersaasarfiit assigisaallu.

Kapitissimanngikkuit coronamik tunillatsissimannginnermut uppernarsaammik, sivisunerpaamik nal. ak. 48-nik pisoqaassusilimmik peqanngikkaluarlutit sumiiffinnut ukununnga isersinnaavutit:
  • Pisiniarfiit.
  • Allakkeriviit.
  • Mittarfiit.
  • Pisortat oqartussaasuisa suliffeqarfiillu pilersuisuusut saaffiginnittarfii.
  • Assartuutinut tamanit atorneqartartunut utaqqisarfiit.
  • Init suliannik ingerlataqarfissatit.

Maleruagassat atuarfinnut, ulluunerani paaqqinniffinnut, suliffeqarfinnut assartuutinulluunniit tamanit atorneqartartunut atuutinngillat.

Covid-19-imut misissorneqarnissamut periarfissat piffissat ilaanni killeqarsinnaapput, misissuisarfinnit inuit tunillatsissimasunik ujaasinermi qaaqquneqartut aamma inuit ersuitillit salliutinneqartarmata.

Namminersorlutik Oqartussat katersuuttarnernut nalunaarutaat aamma ullumi sivitsorneqarani atorunnaarsinneqarpoq.

Eqqaamallugu
Nalunaarummi matumani kapuinermi naammassinnissimasutut isigineqassaatit, kingullermeerlutit kapitissimaguit.

Tamakkiisumik kapitissimanermut uppernarsaat tassaasinnaavoq Coronapas, pappiaqqat akiuussutissamik kapitinninnut atatillugu tunniunneqarsimasut imaluunniit peqqinnissaqarfimmiit akiuussutissamik kapitissimaninnut uppernarsaat.

Misissortinneq coronamik tunillatsissimanermut uppernarsaataasoq, ullut 14-it aamma sapaatit akunnerisa 12-it akornanni pisoqaassusilik uppernarsaatitut akuerisaavoq.

Akiuussutissamik kapitinnissamut piumasaqaat meeqqanut 0-11-nik ukiulinnut atuutinngilaq.

Akiuussutissamik kapitinnissamut piumasaqaat inunnut, Nakorsaaneqarfiup kapitittariaqanngitsutut naliliiffigisaanut atuutinngilaq.

Nuummiit Kalaallit Nunaanni illoqarfinnut nunaqarfinnulluunniit allanut angalasussat akiuussutissamik kapitissimanngitsut suli maleruagassanut ilaatinneqarput. Aatsaat ullut tallimassaanni misissortinnerminni tunillatsissimanatik uppernarsarneqarpat, imaluunniit ulluni 14-ini angerlarsimaannarsimagunik sumiiffinnut tamanit orninneqarsinnaasunut ornigussinnaapput imaluunniit katersuunnernut peqataasinnaallutik.

Maleruagassat 31. oktobari tikillugu atuutissapput.

Tikinnissamut nalunaarut tamakkerlugu atuarsinnaavat, uani:
1. - 31. oktobari 2021-mi Nuummi il.il. killilersuinerit pillugit Namminersorlutik Oqartussat nalunaarutaat



Coronamut tunngatillugu apeqqutissallit corona hotline oqa. nr. 801100 imaluunniit e-mail corona@nanoq.gl aqqutigalugit attaveqartassapput.

Tusagassiutinut nalunaarut pillugu apeqqutissallit Kirsten Nystrup, kirn@nanoq.gl imaluunniit oqarasuaat 34 66 90 / 28 66 90 aqqutigalugit pissarsiarineqarsinnaapput.