Kalaallit Nunaat tamakkerlugu toqqaannartumik angalasarneq

Ukioq ataaseq sinnerlugu Kalaallit Nunaannut tikinnermi illoqarfiit nunaqarfiillu sorliit toqqaannartumik angallavigineqarsinnaanerinut maleruagassanik immikkut ittunik atuutsitsisoqarpoq. Illoqarfinnut nunaqarfinnullu, peqqinnissaqarfimmut ornigunnissamut killeqartitsiviusunut angalanermi maannamut ulluni tallimani coronamut misissortinnermi tunillatsissimannginnerup uppernarsarneqarnissaata tungaanut illoqarfinni annerusuni uninngasoqartussaavoq. Aatsaat tamatumunnga ornitamut angalasoqarsinnaavoq. Tallimanngornermi 1. oktobarimiit tamanna taamaatissaaq. Tamatuma kingorna Kalaallit Nunaanni inoqarfinnut tamanut toqqaannartumik angalasoqarsinnaalissaaq.

Kalaallit Nunaannut tikinnissamut piumasaqaatit allat suli atuutissapput:
  • Ilaasussat marluk inorlugit ukiullit tamarmik aallannginnerminni sivisunerpaamik nal. ak. 72-it sioqqullugit PCR-imut misissortissapput. Misissortinnermi tunillatsittoqarsimanngitsoq uppernarsarneqarsinnaassaaq.
  • Immersugassap Sumut-p immersorneqarsimanernut uppernarsaat nassatanik tunniussinermi takutinneqassaaq.
  • Timmisartumut ikinermi kiinnamut assiaquteqartoqassaaq.
  • Akiuussutissamik kapitissimanngitsut tikinnerminni angerlarsimaannassapput aammalu ullut tallimassaanni misissortissallutik. Aatsaat angerlarsimaannartussaaneq tunillatsissimannginneq uppernarsarneqarpat atorunnaassaaq. Akiuussutissamik kapitissimanngitsut misissortikkusunngikkunik, ulluni 14-ini angerlarsimaannartussaapput. Illoqarfimmi uninngaffimmi misissortinnissamut periarfissaqanngippat ulluni 14-ini angerlarsimaannartoqassaaq.
  • Najugaqavissuunngitsut Kalaallit Nunaannut tikinniarunik tamakkiisumik kapitissimassapput. 

Eqqaamallugu
  • Nalunaarummi matumani kapuinermi naammassinnissimasutut isigineqassaatit, kapitinninnit kingullermiit ullut 14-it ingerlareersimappata.
  • Tamakkiisumik kapitissimanermut uppernarsaat tassaasinnaavoq Coronapas, pappiaqqat akiuussutissamik kapitinninnut atatillugu tunniunneqarsimasut imaluunniit peqqinnissaqarfimmiit akiuussutissamik kapitissimaninnut uppernarsaat.
  • Aamma misissortinneq coronamik tunillatsissimanermut uppernarsaataasoq, ullut 14-it aamma sapaatit akunnerisa 12-it akornanni pisoqaassusilik uppernarsaatitut akuerisaavoq.
  • Akiuussutissamik kapitinnissamut piumasaqaat meeqqanut 0-11-nik ukiulinnut atuutinngilaq.
  • Akiuussutissamik kapitinnissamut piumasaqaat inunnut, Nakorsaaneqarfiup kapitittariaqanngitsutut naliliiffigisaanut atuutinngilaq.

Silaannakkut angallatinut ilaasunik amerlanerpaaffiliineq pillugu Namminersorlutik Oqartussat nalunaarutaat tallimanngornermi 30. septembarimi atorunnaassaaq. Tamatuma kingorna inuit qanoq amerlatigisut sapaatit akunnerannut nunatsinnut tikissinnaasut killiligaanerat atorunnaassaaq.

Tikinnissamut nalunaarut tamakkerlugu atuarsinnaavat, uani:

Kalaallit Nunaannut nunatsinnilu angalanermi piumasaqaatit pillugit Namminersorlutik Oqartussat nalunaarutaat nr. 59, 30. september 2021-meersoq



Coronamut tunngatillugu apeqqutissallit corona hotline oqa. nr. 801100 imaluunniit e-mail corona@nanoq.gl aqqutigalugit attaveqartassapput.

Tusagassiutinut nalunaarut pillugu apeqqutissallit Kirsten Nystrup, kirn@nanoq.gl imaluunniit oqarasuaat 34 66 90 / 28 66 90 aqqutigalugit pissarsiarineqarsinnaapput.