2022-mi ineqarnermut akiliutinik iluarsiinerit

 

Ajoraluartumik 1. januar 2022 aallarnerfigalugu Namminersorlutik Oqartussat najugaqarfiutaannit 16-iusunit arfineq marlunni ineqarnermut akiliutit qaffanneqarnissaat pisariaqarpoq.

Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq: ”Najugaqarfiit missingersuutaat oqimaaqatigiissasut, taamaalillunilu aningaasartuutit isertitallu assigiissasut inatsisini ersarissorujussuarmik allassimavoq.”


Ineqarnermut akiliutit qaffanneqarnerinut attartortitsinermut peqqussummi kapitali 4, §§ 28, ineqarnermut akiliutinik aalajangersaasarnermut, ineqarnermut akiliutinik iluarsiisarnermut aqutsinermullu tunngasut tunngavigineqarput, tassungalu ilaatinneqarput inissiaqarfiup ataatsip inissiataani ineqarnermut akiliutinit isertitat tamakkiisut sukkulluunniit aalajangersarneqarnerini najugaqarfiup aningaasartuutissaasa tamarmiusut akilerneqarsinnaanissaat, taakkununngalu inissiamik piginnittumut aningaasaatitigut iluanaarutissanut aningaasartuutit, tak. § 31, aamma ingerlatsinermut atatillugu aningaasartuutit, aqutsinermut akiliutit ilanngullugit, tak. § 32, imm. 1-6, aserorterisoqarnissaanut pinaveersaartitsinermut akiliutit, tak. § 32, imm. 7 aamma akiliutissatut illuartitassatullu taaneqartut.

Namminersorlutik Oqartussat najugaqarfiutaanni arfineq marluusuni isertitassat katillugit 4,9 mio. koruuninik, pingaartumik pisarialinnik iluarsaassinermut aningaasartuutinut atorneqartussanik amerlineqarnissaat pisariaqartinneqarpoq. Tamatuma pisariaqarneranut ukiuni arlalinni aserfallatsaaliuinissamut aningaasaliisoqartarsimannginnera peqqutaavoq.

Naalakkersuisoq Naaja H. Nathanielsen tamatumunnga atatillugu oqarpoq: ”Ineqarnermut akiliutinut iluarsiissutissat atorlugit Namminersorlutik Oqartussat inissiaataanni aserfallatsaaliuisoqarsimannginneranut ajornartorsiut peerneqassanngilaq, kisiannili iluarsagassat sukkasuumik pisariaqarluinnartumillu iluarsisassat ingerlatsinermilu aningaasartuutit isumagineqarnissaat qulakkeerneqassaaq.

Aserfallatsaaliuisoqarsimannginnerata ajornartorsiutaaneranut annertuumik aammalu Naalakkersuisut “Inissianut Tamarmiusunut Pilersaarut”-mi tunngavissiuisimanerat malillugu suliniuteqarnissaq pisariaqarpoq. Maanna aserfallatsaaliuisimannginnerit naammassiniarlugit suliniuteqartoqavinnissaa, taamaalillunilu Namminersorlutik Oqartussat inissiaataannik attartortut pitsaasunik peqqinnartunillu ineqarnissaat najugaqartunut pingaaruteqarluinnarpoq.”

Namminersorlutik Oqartussat najugaqarfiutaanni 2022-mut missingersuusiornermut atatillugu aamma Naalakkersuisut aalajangerput, Namminersorlutik Oqartussat inissiaataanni ineqarnermut akiliutit ukiumoortumik akit allanngoriartornerinut nalilersuut malillugu iluarsineqartassasut, tassalu siullermeertumik 1. januar 2023-mi. Taamaalilluni najugaqarfinni missingersuutitigut amigartooruteqartarnissaq pinaveersaartinneqassaaq.

Paasissutissat:

Attartortitsisarnermi peqqussummi ineqarnermut akiliutip oqimaaqatigiinnissaa pillugu aalajangersakkap malinneqarnissaa qulakkeerniarlugu 1. januar 2022 aallarnerfigalugu najugaqarfinni matuma kinguliani allassimasuni ineqarnermut akiliutit iluarsiivigineqassapput:

 

Qaammammut agguaqatigiissinneri

Inissiamut ataatsimut qaammammut (kr.)

m2-mut ataatsimut qaammammut (kr.)

Najugaqarfik

Inissiat amerlassusii

Qaffaatit procentinngorlugit

Ineqarnermut akiliut

Qaffaat

Ineqarnermut akiliut nutaaq

Ineqarnermut akiliut

Qaffaat

Ineqarnermut akiliut nutaaq

31-102 Nanortalimmi inissiaarsuit

110

7,5%

3.558

265

3.823

54,5

4,1

58,5

35-140 Paamiuni inissiaarsuit

303

1,3%

3.702

50

3.752

60,7

0,8

61,5

36-161 Nuummi inissiaarsuit

805

3,4%

3.458

119

3.577

55,0

1,9

56,9

36-163 Nuummi inissiaarsuit

565

2,0%

3.653

74

3.727

51,9

1,0

53,0

36-165 Nuummi inissiaarsuit

533

6,1%

3.480

211

3.691

53,3

3,2

56,5

37-245 Maniitsumi inissiarsuit

442

3,0%

3.792

113

3.905

59,7

1,8

61,5

30-399 Illut ilaqutariinnut ataatsinut inissiat aamma illut affarleriit

119

9,0%

6.248

560

6.808

66,1

5,9

72,0

Inissiat eqqorneqartussat katillugit

2.877

 

 

Najugaqartut sullissivik.gl aqqutigalugu ineqarnermut tapiissutini periarfissat pillugit paasisaqarsinnaapput.

Annertunerusumik paasisaqarusunnermi Ineqarnermut, Attaveqaasersuutinut Naligiissitaanermullu Naalakkersuisoqarfik attaveqarfigineqassaaq, uunga box909@nanoq.gl