Naalakkersuisut akiuussusersuinermik, tuniluunnermik paasiniaanermik aamma misissortinnermik suliniuteqarneq nukittorsarpaat

akiuussusiineq Corona nunarsuaq tamakkerlugu tuniluukkaluartoq inuiaqatigiinni ammaannarsinnaanissamik qulakkeerinninnissamut suliniutit ilagaat Nuummi misissortittarfiup silataani tupersuaq, tunillatsissimasunik ujartuinermi suliaqartut amerlanerit aamma akiuussusersuiniarluni immikkut suliniuteqarnerit.

Ajoraluartumik Nuummiorpassuit Brugsenip eqqaani Misissuisarfimmut nalunaaquttap akunnerini arlalinni utaqqineq misiginikuuaat. Piffissat ammaffiusut iluanni takkussimasut tamarmik misissortipput. Maanna ikiuigallartussanik takkuttoqalerpoq. Pisortat illoqarfiup qeqqani misissuisarfiup silataani tupersuarmik nappaassapput aammalu oktoberip aallartisimalerneranii Nuummi Misissuisarfik anginerusoq ammassaaq, illullu iluani utaqqinissaq periarfissaassaaq. Misissuisarfik nutaaq Inussivimmiissaaq. Ammaffiusussat sulisussallu pisariaqartitsineq naapertorlugu nikerarsinnaassapput.

”Ulluni makkunani inuit amerlasuut cafénut assigisaanullu isersinnaaniassagamik misissortipput, taamaattumillu misissortinnissamut pisariaqartitsineq annertuvoq. . Tupersualiinikkut misissuisarfimmut utaqqisunut atugassarititaasut pitsanngorsassavagut kiisalu oktoberip sisamaani misissuisarfik nuunneqarpat misissugassat amerlissapput. Naatsorsuutigaarput misissortinnissamut utaqqisarnerup sivikillineranik pitsanngorneranillu kinguneqassasoq”, taama oqarpoq Peqqinnissamut Naalakkersuisoq Kirsten Fencker.

Nunarsuaq tamakkerlugu Coronap tuniluunnera akiorniarlugu misissuisarfik nutaaq Kalaallit Nunaata suliniutaanik nukittorsaasussat ilagiinnarpaat. Maannakkorpiaq tuniluunnermi paasiniaanerit sulisunik amerlanerusunik, tunillanneqarsimasunik qanigisaasunillu attaviginninnermut ikiuisussanik nukittorsarneqarpoq.

Amerlanerusut akiuussutissamik kapitinnissaat kiisalu tamakkiisumik akiuussusertinnissaat qularnaquteqanngitsumik inuiaqatigiit killilersuinertaqanngitsumik ingerlaqqinnissaannik qulakkeerinninnissamut pingaaruteqarnerpaajuvoq.
Akiuussutissamik kapitinnissamut suliniuteqarnerit, misissuinerit aamma tunillatsissimasunik ujartuinerit taamaasillutik annertuumik pingaartinneqarput.

”Anguniagaraarput Peqqinnissaqarfiup ima artukkerneqannginnissaa allaat perulullutik napparsimasut isumagineqarsinnaajunnaarlutik, tamanna ilutigalugu anguniagaraarputtaaq inuiaqatigiinni pissutsit ingerlatiinnarneqarnissaat. Nuummi maannakkorpiaq allanut sanilliullugu annertuumik tunillaassuuttoqaraluartoq, napparsimavimmi uninngasoqanngilaq. Taamaattumik killilersuinerit annertusarnerannut sanilliullugu akiuussusersuinermut, misissuisarnermut aamma tuniluunnermik ujartuinernut annertuumik aningaasaliinissaq toqqarsimavarput”, Kirsten Fencker oqarpoq.

Nuummi katerittunut peqataanissamut imaluunniit kikkut tamat ornigarsinnaasaannut isernissamut akiuussuserneqarsimanermik uppernarsaateqarnissamut piumasaqaat suli atuuppoq.

Paasisaqarnerorusukkuit naalakkersuisup allattaa Kirsten Nystrup email kirn@nanoq.gl imaluunniit oqarasuaat +299 286690 attavigiuk.