Kalaallit Nunaanni Eqqumiitsuliornermut aningaasaateqarfimmi siulittaasoq nutaaq: Nunatsinni eqqumiitsuliornerup siuarsarnissaanut qilanaarpugut

Kalaallit Nunaanni Eqqumiitsuliornermut aningaasaateqarfiup siulersuisui nutaat septemberip 22-ani siullermeerlutik ataatsimiinnerminni inissitsiterput. Taamaalilluni Julia Pars siulittaasutut toqqarneqarluni.
- Toqqarneqarnerput qujamasuutigaarput qilanaarpugullu Kalaallit Nunaanni Eqqumiitsuliornikkut Aningaasaateqarfiup siullerpaap inerisarnissaanik suliaqarnissamut, siulittaasutut toqqarneqaqqammersoq eqqumiitsuliornerullu silarsuaani misilittagaqarluartoq Julia Pars oqarpoq.
Julia Pars Kulturip Illorsuani Katuami pisortaanertut sulinikuuvoq, siulersuisunilu sulinermik misilittagaqarluarluni, ilaatigut eqqumiitsuliornerup kulturillu iluanni.
- Naalakkersuisut allallu attuumassuteqarsinnaasut suleqatigalugit nunatsinni eqqumiitsuliornerup immikkuullarissup siuarsarnissaanut qilanaarpugut, silulittaasutut toqqarneqaqqammersoq taama oqarpoq.
Isiginnaartitsisartunngorniarfimmi aqutsisoq Vivi Sørensen siulittaasup tulliatut toqqarneqarpoq. Siulersuisuni ilaasortat sinneri tassaapput Arnakkuluk Jo Kleist, Katuami pisortaaneq, Hans Jukku Noahsen, nipilersortartoq allanillu sulialik aamma Jacob Froberg Sisimiuni nipilersornermik ilinniarfimmi aqutsisoq.

Kalaallit Nunaanni Eqqumiitsuliornermut Aningaasaateqarfiup siullermeerluni ataatsimiinnerani Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen siulersuisunngortunut tikilluaqqusivoq.

- Suliaq 2014-imili aallartippara, tassami Eqqumiitsuliornermik ingerlatsineq pillugu Inatsisartut inatsisaat nr. 11 6. juni 2016-imeersoq, ilaatigut aningaasaateqarfeqarnissaq siunertaralugu, pilersitseqataaffigisara, atuutilermat. Maanna qilanaarilluinnareerlugu Kalaallit Nunaanni Eqqumiitsuliornermut Aningaasaateqarfimmik pilersitsineq piviusunngulerpoq, Naalakkersuisoq tulluusimaartoq oqarpoq nangillunilu:
- Qularutiginngilaralu aningaasaateqarfik qajannaatsumik toqqammaveqarluartumillu ingerlakkumaarissi, ilissiugassimi eqqumiitsuliornermik immikkut ilisimasallit, taamaattumik qujaffigerusuppassi piumassuseqarluarlusi sulerusunnissinnut.”

Siulersuisut, januar 2022, nallertinnagu aningaasaateqarfik qinnuteqaatinik tigooraasinnaanngorniassammat piareersaateqarlutik suliaqassapput.

Kalaallit Nunaanni Eqqumiitsuliornikkut Aningaasaateqarfik pillugu paasisaqarneruniaruit kulturimut siunnersorti Mika Lyberth attavigisinnaavat e-mail: mlyb@nanoq.gl aamma telefon: 34 57 44.