Innarluutilinnut illersuisup nutaap ilanngutitsineq, siusissumik suliniuteqarneq aamma immikkut ilisimasaqarneq sorsuutiginiarpai

Anja Hynne Nielsen Naalakkersuisut innarluutilinnut illersuisutut nutaatut 1. decembari 2021 sulilersussatut toqqarpaat. Inuit innarluutillit tusarneqarnissaat qulakkeerniarpaa aamma inunnut innarluutilinnut piviusumik pitsannguisoqassasoq ukkatariniarlugu.

Kalaallit Nunaata Innarluutilinnut illersuisuata nutaap Anja Hynne Nielsenip kissaatigaa inunnut innarluttilinnut assigiimmik naleqarneq, inuunermi nalillit, assigiimmik periarfissaqarneq aamma tikinneqarsinnaaneq/attavigineqarsinnaaneq sulissutiginiarlugit. Suliniutit aalajangersimasut inuit innarluutillit aallaqqaataaniit eqqortumik ikiorneqarnissaannik imallit qularnaveeqquserneqarnissaat sulissutiginiarpaa. Tapersersorneqarnissamik kissaateqarluni saaffiginnittut ataasiakkaat pisariaqartitaat aallaavigalugit akuersaarneqartariarput. Inunnguuseralugu innarluuteqaraanni imaluunniit inuunerup ingerlanerani innarluuteqalersimagaanni tamanna atuuppoq. Ilanngutitsineq, ataqqinassuseqarneq aamma misigeqataaneq Anja Hynne Nielsenimut naleqartitatut pingaaruteqarput. Taamaalilluni Anja takorluukkani pillugit ima oqaaseqarpoq:

”Inuit pisinnaasakillisimasut eqqortumik tapersersorneqassapput tapersiutinik atortulerneqassallutik aamma suliniarfigineqassallutik, taamanngippat ilinniarneq, sulineq aamma sunngiffimmi sammisaqarneq immikkoortinneqarnikkut annaaratarsinnaammatigit. Tamatuma nassatarisinnaavaa kiserliorneq, immikkoorneq aamma inuunermi nalilinnik amigaateqarneq. Taamaattumik inuit assigiinngissinnaanerannik paasinninneq, akuersaarneq aamma ataqqinninneq pingaaruteqarput. Inuit pisinnaasakillisimasut ilaqutaasalu pisortatigut sullissisunit, politikerinit inuiaqatigiinnillu qanoq isigineqarneri qanorlu pineqaneri pingaaruteqarluinnarput. Assigiimmik ataqqinassuseqarnermik aamma tikinneqarsinnaanermik/attavigineqarsinnaanermik anguniagaqarnermik ersersitsineq pingaartuuvoq. Inuit ataasiakkaat tusarneqarnissaat pingaartuuvoq.”


Anja Hynne Nielsenip ilaqutaasalu namminneq inuit pisinnasakillisimasut aallaqqaataaniit eqqortumik tapersersorneqarnissaat qanoq pingaaruteqartigisoq misiginikuuaat. Taamaattumik atuuffimmini nutaami siusissumik immikkullu ilisimannittumik suliniuteqarnissaq ukkatariniarpaa. Anja erneqarpoq qaratsaminit pisumik nukillaarutilimmik, peqatigiiffimmilu ’Hjernebarnet’-imi, angajoqqaat qaratsamikkut ajoqutilinnik meerallit angerlarsimaffimminni meeqqaminnik sungiusaasartut peqatigiiffianni suliniaqataasimavoq. Anjap innarluutilinnut illersuisutut takorluugaasa ilagaat inunnik ersitsumik ersinngitsumillu innarluutilinnik piviusumik ilanngutitsineq taamaalillutik tamarmik periarfissanik atuisinnaaleqqullugit. ”Anguneqarsinnaaneq – timikkut, inooqataanikkut aamma qarasaasiakkut” tassarpiaavoq Innarluutillit sapaatip akunnerannut, sapaatip akunnera 41-mi ingerlanneqartumi sammisaasoq.

Anja Hynne Nielsen meeraanermini illoqarfinni nunaqarfinnilu assigiinngitsuni najugaqarsimavoq inersimasutullu Nuummi sulilluni. Retorik-imi (oqallorinnermi) bacheloriuvoq, eskimologimi kandidatiulluni ilaatigullu ukiuni sisamani Inatsisartut Allattoqarfianni atorfeqarpoq. Ukiuni kingullerni Anja inuit innarluutillit pillugit inatsisinik inuillu innarluutillit pisinnaatitaaffii pillugit annertuumik ilisimasaqalersimavoq. Naalagaaffiit Peqatigiit Innarluutillit Pillugit isumaqatigiiissutaat illersuisup nutaap sulineranut qitiulluni inissisimavoq, tamannalu pillugu Anja oqarpoq:

”Nammineerlunga misigaara innarluutilinnut suliniaqatigiiffiit innuttaasunut innarluutilinnut ataasiakkaanut qanoq pingaaruteqartigisut, aamma malugaara Tilioq Kalaallit Nunaanni innarluutilinnut suliniaqatigiiffinnik suleqateqarluartoq. Suleqatigiinneq taanna ingerlateqqinniarpara annertusarlugulu, aamma suliniaqatigiiffinnik, politikerinik aamma minnerunngitsumik inunnik pineqartunik kinguneqarluartumik oqaloqateqartarnissara qilanaaraara.”


Meeqqaanut, Inuusuttunut, Ilaqutariinnut Naalakkersuisup Mimi Karlsenip innarluutilinnut illersuisumik nutaamik toqqaaneq nuannaarutigaa.

”Innarluutilinnut illersuisup sulinera malinnaaffigissallugu qilanaaraara. Inuiaqatigiitsinnit inuit tamarmik pitsaasumik inuuneqarnissaat inuiaqatigiinnilu inuunermut naligiimmik peqataanissaat qulakkiissallugu pingaartuuvoq. Innarluutilinnut illersuisoq inunnut innarluutilinnut taakkulu pisinnaatitaaffiinut pingaarutilimmik oqaaseqartartuuvoq. Suleqatigiinnissarput qilanaaraara.”


Annertunerusumik paasisaqarusukkuit naalakkersup allattaa Naja Lynge Petersen attavigiuk e-mailikkut: nlyp@nanoq.gl imaluunniit oqar. 27 02 43