Islandip Kalaallit Nunaatalu suleqatigiinnerulernissaannut ataatsimut isumaqatigiissummik (Joint Declaration) atsioqatigiinneq

Islandip KalaalIit Nunaatalu suleqatigiinnerunissaannik islandimi nunanut allanut ministeri Gudlaugur Thor Thordarson aammalu Nunanut Allanut, Inuussutissarsiornermut, Niuernermut Silallu Pissusaanut Naalakkersuisoq Pele Broberg ullumikkut Nunat Avannarliit Killiit ulluanni ataatsimut isumaqatigiissummik atsioqatigiipput. Naalakkersuisoq Ministerilu nunat taakku marluk nukittuumik suleqatigiinnerat nuannaarutigaat. Nalunaarusiarlu ”Kalaallit Nunaat Islandilu issittumi nutaami” saqqummiunneqaqqammersoq maluginiarluarpaat. Nunat taakku marluullutik maanna suleqatigiinnerat immikkuualuttukkuutaanik misissuiffigilluarsimasunik imaqarpoq.

Kalaallit Nunaata Islandillu qanimut suleqatigiinnerisa annertusarneqarnissaannut isumaqatigiissut Islandimi Inatsisartut Althingip ukioq manna majip 31-ani akuersissutigaa. Kalaallit Nunaata Islandillu ataatsimut soqutigisaqaqatigiiffiini attaveqaqatigiinnerup annertusarneqarnerunissaat Islandimi naalakkersuisut Althingi isumasioqatigalugu islandimiut kalaallillu ataatsimiititaliaata siunnersuutai pillugit suliassinneqarput. Island kalaallit nunaat pillugit ataatsimiititaliaq Nunanut Allanut Ministerimit Thordarsonimit allaartinneqarpoq.

Naalakkersuisut illuatungeriillutik ministerit marluullutik isumaqatigiissutaat (Joint Declaration) ataatsimoorlutik eqqartorpaat isumaqatigiissutigalugulu. Isumaqatigiissummi nunat iluminni nukittuffitik siuariartuutaasumillu suleqatigiinnerat iluarisimaarneqarluni pineqarpoq. Suleqatigiinneq islandimiut Nuummi 2013-mi konsulateqalernerisigut Kalaalli Nunaatalu Reykjavikimi 2018-mi sinniisoqarfeqalernerasigut nukittorsarneqarpoq.

”Isumaqatigiissutip ullumi atsiorneqarneratigut nunamup sanilitsinnut qaninnerpaamut attaveqaqateqarluarnerput annertusarniarlugu alloriartoqaqqippoq. Kalaallit Nunaat pillugu misissuineq toqqammaviliivoq, Altihingimi aalajangersagaq pisinnaatitsipput, ullumikkullu isumaqatigiissuteqarnikkut isumaqatigiinnerit nukittorsarneqarput. Maanna atortussat sakkussallu pisariaqartut pigineqalerput, oqartoqarsinnaavorlu suliniummi uani immikkoortumik nutaamik aallartittoqartoq”
taama oqaaseqarpoq Minister Thordarson.

”Isumaqatigiissutip pingaarutillip ullumi atsiorneqarneranut usorsisimaarlungalu tanngassimaarpunga. Naalakkersuisut Islandimik attaveqaqatigiinnerup annertusarnissaanut suliniuteqarnerat ataatsimut isumaqaitigiissummi ersersinneqarpoq, siunissamullu sulinerup aallartinnissaanut tunngaviliisuulluni.” taama oqaaseqarpoq Naalakkersuisoq Broberg.

Ataatsimut isumaqatigiissuteqartoqarneratigut Issittumi nalunaarusiamilu ”Kalaallit Nunaat Islandilu issittumi nutaami” Kalaallit Nunaat Islandilu pingaaruteqarnerat naqissuserneqarpoq, tassanilu suleqatigiiffiusinnaasut nutaat ersarissarneqarlutik. Ukiuni kingullerni Kalaallit Nunaata Islandillu nioqqutissanik kiffartuussinernillu niueqatigiinnerisa annertusiartornera aammalu nunat taakku akornanni toqqaannartumik silaannakkut angallassisoqartarnerata ammaassisoqaqqinneranut iluarisimaarneqarpoq. Covid-19-ip kingorna nunani taakkunani takornariaqarnikkut sanarfiniarsareqqilerneranni alloriarneq tamanna pingaaruteqarpoq. Aalisarnerup tungaatigut suleqatigiinnerup annertusarneratigut aammalu aalisakkat pillugit illuatungeriit suleqatigiinnerisa annertusarneqarnerat pitsaasuuvoq. Aammattaaq ministerit isumaqatigiipput illuatungeriillutik oqaloqatigiinnermikkut ataatsimoorullugu annertusisamik Isumaqatigiissutinik suliaqartoqarnissaanut aallarniutaasumik misissuisoqassasoq, tassani killeqanngitsumik niueqatigiissinnaanermut suleqatigiinnerit nukittorsarnissaanut aqqutaasinnaasutit isigalugit oqaloqatigiissutigineqassallutik.

Attavissaq: Naalakkersuisumut allatsi Juno Berthelsen: Mobil: +299 267372, email: jube@nanoq.gl