Oxford Global Projectip nalunaarusiaa

Tuluit siunnersuisarfiata Oxford Global Projectip Kangerlussuup Sisimiullu akornanni aqqusinermik suliniutaasinnaasumi periarfissat pillugit nalunaarusiaata inernera pillugu tamanut ammasumik ataatsimiitsitsineq. Ataatsimiinneq Ilisimatusarfimmi sisamanngornermi ulloq 23. september nal. 16.00 ingerlanneqassaaq – kikkut tamarmik tikilluaqqusaapput.

Oxford Global Projects, reference class forecasting (RCF)-mik taaneqartumik tunuliaqutaqarluni attaveqaatinik suliniutinik annertuunik siunnersuisarnermik immikkut ingerlatsisoq, imminut akilersinnaassutsimik, aarlerinaatinik eqikkaanermik aqqusiniliornermilu siunissami periarfissanik suliaqarnini maanna naammassisimalerpaa.

Nalunaarusiaq Qeqqata Kommunia Namminersorlutillu Oqartussat suleqatigalugit suliarineqarpoq, Kangerlussuup Sisimiullu akornanni aqqusiniornermik suliniummut isummernissaq sioqqullugu aalajangernissamik toqqammavimmik naammattumik piareersaasiorluni suliniaqqinnissamut ikorfartuutaassaaq.

Nalunaarusiamik suliaqarneq Naalakkersuisut naalakkersuisoqarfiillu attuumassuteqartut arlallit ingerlaavartumik oqaloqatigalugit, Qeqqata Kommunianik aallartitanik, soqutigisaqaqatigiinnillu Arctic Business Circlemik allanillu sumiiffinni inuussutissarsiornikkut soqutigisaqartunik ilanngussisoqarluni ingerlanneqarpoq.

Oxford Global Projectimit siunnersortit, paasissutissanik & RCF-millu immikkut ilisimasalimmit Andreas Leed aamma attaveqaqatigiinnermut suliniutini aarlerinaatinillu nalilersuinermi immikkut ilisimasalimmit Dr. Samuel Franzenimit sinniisoqartut, sapaatit akunnerisa 38-anni Nuuk, Sisimiut Kangerlussuarlu tikeraassavaat.

Illoqarfinni tamani tamanut ammasumik aaqqissuussinerni Andreas Leed Dr. Samuel Franzenilu nalunaarusiami periutsimik atorneqartumik, tunngavissatut naatsorsuutigisanut atatillugu tamaviaarnartut, misissueqqissaarnerit inernerinik kiisalu kaammattuutinik siunissamilu periarfissanut atatillugu sillimmartaarutinik eqikkakkanik saqqummiussissapput.

Nalunaarusiaq kingorna Kangerlussuup siunissaanik aallussisumik qulaajaalluni suliaqaqqinnermut ilaatinneqassaaq, taannalu Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiisitaanermullu Naalakkersuisoqarfimmit aqunneqarluni nanginneqassaaq.

Taamattaaq Oxford Global Projectip nalunaarusiaq taamannak aaqqissuussinerni Sisimiuni Kangerlussuarmilu saqqummiutissavaa.

Nuummi aaqqissuussineq tamanut ammasuuvoq tuluttullu ingerlanneqassalluni.





Pilersaarut:
Nuuk: 23. September 2021 Ilisimatusarfiup auditoriaani, nal. 16.00-1800
Sisimiut: 26. september 2021 Taseralik nal. 19.00-21.00, aaqqissuussineq streamerneqassasoq naatsorsuutigineqarpoq.
Kangerlussuaq: Kangerlussuaq Multihusimi d. 27. september 2021 nal. 19.00-21.00




Attaveqarfissaq:

Niels Kristian Skou (Aningaasaqarnermut Naalakkersuisoqarfik)
Toqq/direkte 34
nisk@nanoq.gl