Naqqiut: Naalakkersuisut nunatsinni innuttaasut sinnerlugit kiffartuussipput



Danskit tusagassiiveqarfiata Berlingske-p Nunanut Allanut, Inuussutissarsiornermut, Niuernermut Silallu Pissusianut Naalakkersuisup apersorneqarluni oqaaserisamai 19.09.2021 saqqummiuppai. Naalakkersuisullu oqaatigisai pillugit Naalakkersuisut Siulittaasuata issuarneqartut isumaqatiginngilai.

Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq.

Innuttaasullu nunatsinni assigiinngitsumik pineqarnissaat, taasinernut allanullu mattunneqarnissaat Naalakkersuisut Naalakkersuisooqatigiillu isumarinngilaat.

Ukiuni kingullerni ullorlu manna tikillugu Inatsit Tunngaviusussaq pillugu Isumalioqatigiissitaq sulivoq. Tassani apeqqutit nunatta qanoq iluseqartumik tunngaveqarnissaanik sulineq ingerlanneqarpoq. Sulinerlu inaariartulerpat inuiaat oqallinnissaat tullinnguutissaaq. Tassani inuiaat assigiinngitsumik isumaqarnerat inissaqartillugu oqallittoqarnissaa Naalakkersuisut qilanaaraat.

Erseqqissaatigisariaqarportaaq Naalakkersuisut Namminersorneq Pillugu Inatsit aallaavigalugu sulimmata, nunattalu namminiileriartorneruneranut sulinermi suleqatissagut, Namminersorneq Pillugu Inatsit tunngavigalugu tassaammata danskit naalakkersuisui, tamannalu naalakkersuisut siulittaasuata susassaqarfigaa.

Suliat qulaani taaneqartut pissutigalugit Nunanut Allanut, Inuussutissarsiornermut, Niuernermut Silallu Pissusianut Naalakkersuisup tusagassiorfimmit issuarneqarnera Naalakkersuisut isumarinngilaat.

Naalakkersuisut nunatsinni innuttaasut sinnerlugit kiffartuussipput, tunngaviusumillu isumaqarpugut assigiinngisitaarnerput peqqinnartuusoq avissaartuffiussanngitsorlu.



Attaveqarfissaq: Uiloq Mathæussen, Naalakkersuisut Siulittaasuata Naalakkersuisoqarfiani Tusagassiuisarnermut Siunnersorti, oq. +299 345128 / +299 228502, email umat@nanoq.gl