2020-mi sulisoqarneq pillugu nassuiaat

2020-mi sulisoqarneq pillugu nassuiaat Naalakkersuisuusimasut sulisoqarnermi pingaarnersiuinerat, iliuusaat killiffiallu saqqummersinneqarpoq. Naalakkersuisut suliassaraat nunatsinni sulisoqarnerup siunissaq ungasinnerusoq qaninnerusorlu isigalugu ineriartor-nerup pitsaasumik ingerlanissaa qulakkiissallugu.

Siunissaq qaninnerusoq eqqarsaatigalugu Covid-19 qaangerniagassat ilagaat. 2020-mi Covid-19-ip malitsigisaani nunatsinni suliffeqarfiit aammalu sulisoqarnikkut ilungersunartumik kiliffeqarput. Naalakkersuisut inuussutissarsiortunut ikiorsiissutinik assigiinngitsunik pilersitsipput. Ikiorsiissutit aqqutigalugit inuussutissarsiortut ingerlaannarnissaat qulakkeerniarlugu aningaasatigut tapiiffigineqarput, aammalu sulisut soraarsinneqannginnissaat anguniarlugu tapiiffigineqarlutik.

Ungasinnerusoq isigalugu nunatsinni sulisoqarnikkut qaangerniagassat pingaarnersaat tassaavoq sulisunik ilinniarsimanngitsunik ilinniarsimasunillu amigaateqarneq. Naak sulisut akornanni ilinniagaqassuseq qaffakkiartoraluartoq, suli appasippallaarpoq. Suliffeqarfiit namminersortut pisortallu pigisaat sulisunik pisariaqartinneqartunik atorfinitsitsiniartarnerat sulisoqaannarnissaallu ajornartorsiutaavoq. Inuusuttut akornanni suliffissaaleqineq aamma qaangerniagassaavoq. Inuusuttut amerlasuut ilinniagaqalerneq ajorput, tamatumalu kingunerisaanik suliffeqarnerup iluani tapertaallutik akuulinngitsoortarlutik.

Tamakkua qaangerniagassat iluarsiniarlugit maannakkut Naalakkersuisut sulisoqarnikkut iliuusissanik suliaqarput, tassani inuusuttut sulilersinneqarnissaat imaluunniit ilinniagaqalernissaat immikkut pingaartinneqarluni.

Erseqqinnerusumik paasisaqarusukkuit Naalakkersuisumut allatsi Naja Lynge Petersen, attavigiuk, e-mail nlyp@nanoq.gl imaluunniit oqarasuaat: tlf.: +299 34 56 11