Kviksølvit pillugit nalunaarut nutaaq

Kviksølvinik atuinissap inerteqqutigineqarnera pillugu nalunaarummik nutaamik Naalakkersuisut saqqummeeqqammerput. Nalunaarut kviksølvinik aamma kviksølvit ataqatigiiffiinik eqqussinissamik, avammut annissuinissamik tuniniaanissamillu inerteqquteqarluinnarnermik ilaatigut imaqarpoq.

- Kviksølv inunnut annertuumik ajoqusiisinnaasoq misissuinerit inernerisa takutimmassuk, tunisassianik kviksølvinik akulinnik eqqussinissap inerteqqutigineqarnissaa Naalakkersuisut pingaartippaat. Maleruagassanik nutaanik, peqqissutsitsinnut avatangiisitsinnullu iluaqutaasinnaasunik suliaqartoqassasoq Naalakkersuisut aalajangerput,Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

2020-mi Ukiaanerani Ataatsimiinnermi Inatsisartut aalajangerput, Kalaallit Nunaata Minamatami isumaqatigiissummut ilaalernissani akuerissagaa, Inuit peqqissusaat avatangiisillu kviksølvinik inunnit pilersinneqartumik aniatitsinermut illersorneqarnissaat, Minamatami isumaqatigiissummi siunertaavoq. Nalunaarutip nutaap atuutilernerani Kalaallit Nunaat Minamatami isumaqatigiissummi pisussaaffinnik naammassinnilissaaq.

Minamatami isumaqatigiissut
Nunarsuarmi kviksølvit pillugit isumaqatigiissummut, Minamata-mut isumaqatigiissummut, isumaqatiginninniarnerit 2013-imi januaarimi naammassineqarput. Isumaqatigiissummi inuit peqqissusaasa avatangiisillu inuit kviksølvinik aamma kviksølvit ataqatigiinnerinut, inunnit aniatinneqartunut illersorneqarnissaat siunertarineqarpoq.

Isumaqatigiissummi ilaatigut kviksølvinik piiaanissamut aamma nunani tamalaani kviksølvit niuerutiginissaannut killilersuinerit, tunisassianik kviksølvinik akulinnik arlalippassuarnik sananissamut, eqqussuinissamut annissuinissamullu inerteqquteqarnerit, kviksølvinik atuiffiusunik sanaartornerniinerteqquteqarnerit arlaliusuni inerteqquteqarnerit ingerlatsinermulluunniit piumasaqaatit aalajangersarneqarput, kiisalu tunisassiani suliffissuarnilu sulianik ingerlatsinerni kviksølvinik atuilernissaq pinngitsoortinniarneqarluni. Taamaalilluni isumaqatigiissummi aalajangersakkani kviksølvit atuunnerini tamaginni; piiaanermiit atuilernermiillu aniatitsinernut igitassartaannillu suliarinninnermut kviksølvinut maleruagassiuussisoqarpoq.

Nalunaarut nutaaq takuuk uani.

Paasissutissanik annertunerusunik piniarnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisoqarfimmut pisortaaneq Mette Skarregaard Pedersen oqarasuaammut: 346476/529844 imaluunniit e-mail: mesp@nanoq.gl imaluunniit pan@nanoq.gl aqqutigalugit attaveqarfigineqassaaq.