Kultureqarnermut Naalakkersuisup nunatsinni eqqumiitsuliornermi aningaasaateqarfimmi siulersuisut siullerpaat toqqarpai

Ilinniartitaanermut, Kultureqarnermut, Timersornermut Ilageeqarnermullu Naalakkersuisup, Kalaallit Nunaanni Eqqumiitsuliornermut Aningaasaateqarfimmi, siulersuisut siullerpaat toqqarpai.

Naalakkersuisut Kalaallit Nunaanni Eqqumiitsuliornermut Aningaasaateqarfik pillugu Namminersorlutik Oqartussat nalunaarutaat nr. 43, 13. august 2021-mersooq, aggustimi saqqummiuppaat taamaalilluni eqqumiitsuliornermi aningaasaateqarfimmik pilersitsinissaq aallartissinnaanngorluni. Kultureqarnermut Naalakkersuisoq siulersuisuni ilaasortanik, ukiuni sisamani atuuttussanik, toqqaavoq.
Toqqarneqartut ukkupput:
  • Julia Pars, Sulisitsisunit innersuussaq,
  • Jakob Froberg, EPI-mit innersuussaq,
  • Vivi Sørensen, EPI-mit innersuussaq,
  • Hans Jukku Noahsen, EPI-mit innersuussaq
  • Kiisalu Arnakkuluk Jo Kleist Katuamit innersuussaq.
- Piukkunnartorpassuarnik innersuussisoqarsimanera assorsuaq nuannaarutigaara, toqqaanissarlu assorsuaq ajornakusoorsimavoq. Aningaasaateqarfiup, januarimi 2022-mi atuutilertussap, ilaatigut eqqumiitsuliornermut aningaasaliissutinut qinnuteqaatinik suliaqartussap, suleqatiginissaa qilanaaraara, Naalakkersuisoq Peter P. Olsen oqarpoq.

Siulersuisut aningaasaateqarfiup sulineranut pingaarnertigut najoqqutassanik aalajangersaassapput. Aningaasaateqarfiup atuunnermini ammasuunissaa paasiuminartuunissaalu siulersuisut qulakkiissavaat. Siulersuisut suliassasa siulliit ilagissavaat, eqqumiitsulioriaatsini tamani sulianik paasisimasalinnik toqqaanissaq.

Eqqumiitsuliornermut aningaasaateqarfik januaarip aallaqqaataani 2022-mi eqqumiitsuliornermut aningaasaliissutinut qinnuteqaatit siulliit tigusinnaanngussavai.

Kalaallit Nunaanni Eqqumiitsuliornermut Aningaasaateqarfik pillugu paasisaqarnerorusukkuit Naalakkersuisup allattaa Paninnguaq Steenholdt attavigisinnaavat e-mail: pslt@nanoq.gl imaluunniit telefon: 34 57 02