Ullormut pisarineqartut nalunaarutigineqartarneri pisariinnerulerpoq

Aalisarneq pillugu nakkutilliinermut nalunaarut nutaaq maleruaqqusat pineqartut pillugit pisariillisarlugit suliaavoq, ullutsinnut naleqqussarlugit atuisunut oqartussanullu atoruminarsarlugu suliaalluni. Inuiaqatigiit digitalimik atorluaaleriartornerinut ilaavoq, datamik atuineq pitsaanerulersinneqassalluni aamma datamik atuineq naammassisaqarfiulluarnerulissalluni.

Aalisarnermik nakkutilliineq pillugu nalunaarut naapertorlugu aalisariutip aalisarneq tamaat kalinnermiit kalinnermut nalunaarsussavaa aamma umiarsualivimmit avalannermiit ikinnerpaamik ullormut ataasiarluni pisanik nalunaaruteqartassalluni.

Nalunaarsuisussaatitaaneq aalisartilluni pisaqarsimanngikkaluaraanniluunniit aamma atuuppoq. Nalunaarsuisussaatitaaneq unittarpoq umiarsualivimmut tikinnermi. Nalunaarsuineq elektroniskimik pisarpoq.

Nalunaarut nutaaq aggustimi atulertoq nalunaarutaasimasunik nalilersuillunilu ataatsimoortitsineruvoq, elektroniskimik nalunaarsuisoqartalerluni, aalisarnermik inuussutissarsiuteqartunut attuumassuteqartunullu pitsaaqutitalimmik.

Kilisaataatilik Jørgen Eriksen Sermitsiaq normu 36-mut oqarpoq Namminersorlutik Oqartussat nunatsinni aalisarnermut nakkutilliinerminni malittarisassanik sakkortunerulersitsinerat, sinerissamut qanittumi aalisartunut allaffissornerulernermik suliakkersuutaalertoq, allaffimmilu ingerlatsinermik tunngaveqarpallaarluni.

Nangillunilu: Soorlu aamma piumasarineqartoq, aalisartut atortunik qaammataasakkoortumik nassitsinermi atortussanik pisissasut ikkussuillutillu, taamaalillutillu KANUAANA-mut nalunaaruteqarsinnaalerniassagamik.

Pisanik ullut tamaasa nalunaaruteqartarnissamut kalinnerillu aamma nalunaarutigineqartarnissaannut Jørgen Eriksenip isumakuluutaa nutaajunngilaq. Atuisunut atuartartunullu eqqaassutigiinnarsinnaavara maannakkut atortuulersut atunngikkallarmata logbogimut allanneqartussat tamavimmik quppernerpassuarnut allalluni nalunaarutigineqartartussaammata.

Aamma logbogi allatuiffigineqarsimasoq assingalu kopi aamma inuttat allattorsimaffiat tunitsivimmut tunniunneqartartussaallutik, qulakkeerneqarsimassallunilu logbogimik nutaamik allattuiffeqarnissaq, Aalisarnermut Piniarnermullu Naalakkersuisoq, Aqqaluaq B. Egede erseqqissaavoq.

Sinerissap qanittuani ullut arfineq pingasut qaangerlugit aalisarneq ajortut nakkutilliinermut nalunaarutaasimasumut immikkut akuerineqarlutik nalunaartussaatitaanngillat. Tamanna atorunnaarsinneqarpoq elektroniskimik logbogi atorneqalermat.

Aalisariutini 24 meterinik anginerni inuttat nalunaarsuiffiannut allanneqartarneri ingerlatiinnarneqassaaq. Tamanna pisariinnerulerpoq inuttat atii aallaqqaarnermi allassimaneqaraangata. Soorlu aamma pisanik nalunaaruteqartarneq.

Elektroniskimik logbogeqartut nassitsinerminnut uppernarsaammik siunissami tunineqartassapput aamma maleruaqqusanik naapertuuttumik atuinerminnut uppernarsaammik tunineqartassallutik. Aalisartup aalisariummi nammineerluni nalunaarsorsimasani atorsinnaassavai naatsorsuutitullu atorsinnaalissallugit.

Attavigineqarsinnaavoq: Michael Dennis Pedersen, Kalaallit Nunaanni Aalisarsinnaanermut Akuersissutinik Nakkutilliisoqarfimmi pisortaq. E-mail: mdpe@nanoq.gl