Ininut tamanit iserfigineqarsinnaasunut isernissamut kiisalu Nuummiit Sisimiuniillu aallarnissamut kapitissimanissamut piumasaqaateqartoqarpoq

Assersuutigalugu Nuummi Sisimiuniluunniit neriniartarfimmut, filmertarfimmut, timigissartarfimmut katersugaasivimmulluunniit isissaguit tamakkiisumik kapitissimanissat, imaluunniit coronamik tunillatsissimannginnermut uppernarsaammik sivisunerpaamik nal. ak. 48-nik pisoqaassusilimmik takutitsinissat piumasaqaataalerpoq.

Naalakkersuisut aalajangerput, Nuummi tuniluunneq unikaallatsinniarlugu Coronapas-eqarnissaq atuutsinneqalissasoq, tamatumalu peqatigisaanik Sisimiuni tunillatsittartut ikiliartormata killilersuutit qasukkaallatsinneqassapput.

Taamaammat Sisimiuni killilersuutit qasukkaallatsinneqarnerini uku taamaallaat killilersuutaalerput: Sumiiffiit kikkunnit tamanit iserfigineqarsinnaasunut iserniaraanni tamakkiisumik akiuussuserneqarsimanissaq kiisalu Sisimiuniit aallarnermi maleruguassat. Killilersuutit allat Sisimiuni atuukkunnaarput.

Maleruagassat nutaat ullumi ulloq aallarnerfigalugu 30. septembari 2021 ilanngullugu atuutissapput.

Sumiiffinnut ukununnga taamaallaat ornigussinnaavutit, tamakkiisumik kapitissimaguit imaluunniit coronamik tunillatsissimannginnermut uppernarsaammik sivisunerpaamik nal. ak. 48-nik pisoqaassusilimmik takutitsisinnaaguit:
  • Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
  • Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
  • Innuttaasut illui assigisaallu.
  • Atuakkanik atorniartarfiit.
  • Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit. 
  • Nujalerisut, tagiartuisartut, pinnersaasarfiit assigisaallu.

Akiuussutissamik kapitissimanngikkuit coronamik tunillatsissimannginnermut uppernarsaammik sivisunerpaamik nal. ak. 48-nik pisoqaassusilimmik takutitsinngikkaluarlutit isersinnaavutit:
  • Pisiniarfiit
  • Allakkeriviit
  • Mittarfiit
  • Pisortani oqartussaasut sulliviillu pilersuiviit kiffartuussinermi saaffiginnittarfii. 
  • Assartuutit tamanit atorneqarsinnaasut utaqqisarfii.
  • Init suliannik ingerlatsivigisassatit.

Innuttaasut akiuussuserneqarsimanngitsut Sisimiuniit aamma Nuummiit angalasut suli maleruagassat malissavaat. Aatsaat ullut tallimassaanni misissortinnermi tunillatsissimannginneq uppernarsarneqarsinnaappat imaluunniit ullut 14-it angalarsimaannareernermi, sumiiffinnut tamanit orninneqartartunut orniguteqqusaalissapput katersuunnernullu peqataasinnaanngussallutik.

Maleruagassat atuarfinnut, ulluunerani paaqqinniffinnut, suliffeqarfinnut assartuutinulluunniit tamanit atorneqartartunut atuutinngillat.

Piffissap ilaani Covid-19-imik misissuisarnerit killeqarsinnaapput, misissuisarfinni inuit tunillatsissimasunik ujartuinermi nassaarineqartut aammalu inuit ersiutillit salliutinneqartarmata.

Innuttaasut susassareqatigiinermikkut mianersornermikkullu maanna killiffik qaangilertorneqarsinnaasoq Peqqissutsimut Naalakkersuisup, Kirsten Fenckerip, oqaatigaa.

- Nunatsinni ikioqatigiinnikkut, susassareqatigiinnikkut mianersoqatigiinnikkullu takutereerparput tuniluunneq unitsissinnaallugu. Taamaammat maannamut pisut ilinniarfigalugugit mianersorutta killiffipput anigulertorsinnaavarput, Kirsten Fencker oqarpoq.

Eqqaamassavat
Nalunaarummi matumani aappassaanik akiuussusertereerninniit naammassinnissimasutut isigineqassaatit.

Tamakkiisumik kapitissimanermut uppernarsaatitut Coronapas, pappiaqqat kapuinermut atatillugu tunniunneqartut imaluunniit peqqinnissaqarfimmiit akiuussutissamik kapitissimanermut uppernarsaat atorneqarsinnaapput.

Aamma misissortinnermi Coronamik tunillatsissimanerup paasineqarneraniit ullut 14-it aamma sapaatit akunneri 12-it ingerlareersimappata, tamanna uppernarsaatitut akuerineqarpoq.

Kapitissimanissamut piumasaqaat meeqqanut 0-11-nik ukiulinnut atuutinngilaq.

Kapitinnissamut piumasaqaat inunnut, Nakorsaaneqarfimmiit kapitittussaanngitsutut naliliiffigineqartunut atuutinngilaq.