Pele Broberg-ip Naalakkersuisut sinnerlugit USAID-isumaqatigiissut atsiorpaa

Nunanut Allanut, Inuussutissarsiornermut, Niuernermut Silallu Pissusaanut Naalakkersuisoq Pele Broberg Naalakkersuisut sinnerlugit USAID-isumaqatigiissut atsiorpaa

Nunanut Allanut, Inuussutissarsiornermut, Niuernermut Silallu Pissusaanut Naalakkersusoq Pele Broberg Naalakkersuisut sinnerlugit pingasunngorneq ulloq 15. september 2021 USAID-isumaqatigiissut amerikarmiut naalakkersuisui sinnerlugit Margot Ellis, Actic Assistant Administrator USAID Europe & Euroasia peqatigalugu atsiorpoq.

Isumaqatigiissut sinaakkutitut isumaqatigiissutaavoq aamma isumaqatigiissummi siunertaavoq annertunerusumik aningaasatigut USA-p Kalaallit Nunaatalu akornanni suleqatigiinnermi periarfissamik pilersitsinissaq. Isumaqatigiissummi USAID-miit aningaasaliissutit katillugit 10 mio. dollars, ukiuni tullerni tallimani ukioq 2026-p tungaanut agguataarneqartussat qulakkeerneqarput.

Annertunerusumik USA-mik suleqateqarneq pilersinneqarpoq ulloq 28. oktober 2020-mi, tassani Naalakkersuisut amerikamilu naalakkersuisut ”The Common Plan for the US-Greenland Cooperation in Support of our Understanding of Pituffik (Thule Air Base)” atsioqatigiinnerisigut. Nunat marluusut akornanni isumaqatigiissutip siunertarisimavaa USA-mik suleqateqarnerup annertusarnissaa suleqatigiinnermut periarfissat siunissamilu suliniutaasut inerisarniarlugit, aamma USAID-isumaqatigiissut alloriarneruvoq pitsaasoq USA-p Kalaallit Nunaatalu akornanni annertusiartortumik suleqatigiinnermut.
USAID-isumaqatigiissut ”The Common Plan”-imi sukarsuit sisamat tunngavigineqartut aallaavigaat; 1)Nunat marluk akornanni attaveqarneq nukitsorsarneqassasoq Kalaallit Nunaata aningaasatigut unammillersinnaassusaata pisinnaasai pitsanngorsaaviginerisigut suliffeqarfeqarfimmut ineriartortitsinermik tapersersuinikkut, niueqatigiinnerup annertusarneratigut, kiisalu aningaasatigut allanngortitaarinikkut, 2) takornariaqarnerup iluani aningaasatigut periarfissanik ineriartortitseqqinnikkut aamma illoqarfinni nunaqarfinnilu piffimmi nammanneqarsinnaasumik inuiaqatigiit inerisarnerisigut, 3) nukissiutit minguittut atornissaata inerisarneqarnera aamma silap pissusiata allanngoriartorneranut naleqqussarneq, aammalu 4) aatsitassani- aammalu nukissiuteqarnermi suliassaqarfimmi pitsaasumik suliffeqarfiit ingerlanneqarnissaannut suliniutini tapersersuinikkut.

Isumaqatigiissummi ukkatarineqarpoq kalaallit inuiaqatigiivisa Kalaallit Nunaanni aningaasaqarnermi sunniuteqaqataanissaasa pitsaasumik periarfissaasa annertusarnissaat, namminersortut akornanni suleqateqarnissamik ujartuineq aqqutigalugu. Nunanut Allanut, Inuussutissarsiornermut, Niuernermut Silallu Pissusaanut Naalakkersuisup USA-mik suleqateqarnerup USAID-isumaqatigiissut aqqutigalugu inerisaqqinneqartoq nuannaarutingaa tassungalu atatillugu oqaatigalugu:

”’USA-mik suleqateqarnitta inerisaqqinneratigut kissaatigut pisariqartitagullu aallaavingalugit kalaallit inuiaqatigiit aningaasaqarnerlu periarfissanik pilersitsivoq. Nuannaarutingaaralu amerikarmiut naalakkersuisuinik isumaqatigiissummik uannga isumaqatigiissuteqarnerput, alloriarnerusorlu Kalaallit Nunaata nunarsuarmut ammariartorneranut”.

Attavissaq: Mininnguaq Kleist, Departementschef, +299 351 48, Email: mikl@nanoq.gl