Naalakkersuisut innaallagiamik kiassarnermut akigititat appartippaat

Naalakkersuisut mingutsitsinngitsumik nukissiorneq annertusitinniarpaat, taamaalilluni innuttaasut amerlanerusut kiassaammut uuliatortumut taarsiullugu mingutsitsinngitsutut qinigassatut innaallagiamit kiassarnermut periarfissaqalissallutik. Taamaattumik innaallagiamit kiassarnermut akigititat appartinniarlugit Naalakkersuisut aalajangerput.

Kiassarnermut akigititat ulloq 1. septembari 2021 aallarnerfigalugu appartinneqarnissaat Naalakkersuisut akueraat. Akigititat appartinneqarnerat atuisartunut iluaqutaassaaq, kisianni aamma nunatsinni mingutsitsinngitsumut allanngoriartortitsinermut iluaqutaasussaalluni, taamatullu Nukissiorfiit aningaasaqarnera nukittorsarneqassasoq naatsorsuutigineqarpoq, tassami akigititat apparneranni sullitat amerlanerusut innaallagiamit kiassarnermik qaminneqarsinnaasumik atuilissasut naatsorsuutigineqarmat.

”- Imminut pilersornerulernissaq aammalu Kalaallit Nunaata aningaasaqarnerata piujuartitsiviusumik tunngavilimmik nukittorsarneqarnissaa Naalakkersuisut sulissutigaat. Innaallagiamit kiassarnermik atuinerulernermi aningaasaqarnerput aammalu mingutsitsinngitsumut allanngoriartortitsinerput nukittorsarneqassapput”, oqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund.

Nukissiorfiit aningaasanik sipaaruteqassapput aammalu Nukissiorfiit illoqarfinni erngup nukinganit innaallagissiorfeqartuni atuisartut amerlanerusut innaallagiamit kiassarnermut ikaarsaartippasigit CO2-mik aniatitsineq annikillisussaalluni.

”- Tamanna suliniutaavoq pingaaruteqartoq. Silap pissusaanut mingutsitsinngitsumik aaqqiissutissamik toqqaaneq imminut akilersinnaassaaq. Nunanit allaniit eqqussuinermik pinngitsuuisinnaannginnerup annikinnerulernissaa aamma Naalakkersuisut pingaarnersiuinerminni pingaartippaat”, oqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund nangillunilu:

”- Naalakkersuisut mingutsitsinngitsumut allanngoriartortitsinissaq sulissutigaat, peqatigisaanillu sumiiffinni ajornartinnagu Kalaallit Nunaanni pisuussutitta atorneqarnissaat kissaatigalugu. Sumiiffinni erngup nukinganik peqarfiusuni innaallagiamit kiassarnerup akikinnerulersinnerani uulia eqqussorneqartoq nukissiamik ataavartumik avatangiisinullu mingutsitsinngitsumik taarsissavarput. Tamanna mingutsitsinngitsumik allanngoriartortitsinermut aammalu imminut pilersornerulernissamik aallussinitsinnut iluaqutaassaaq.”

Ukioq manna siusinnerusukkut Polaroilimi uuliamut akigititat appartinneqarnerisa kingunerisaanik innaallagiamit kiassarnermut akigititat appartinniarlugit Naalakkersuisut aalajangerput. Kiassarnermut akigititat appartinneqarnerat aamma Nukissiorfiit aningaasaqarneranut pitsaanerulersitsissasoq, Nukissiorfiit naatsorsuutigaat.

”- Piujuartitsinissaq aamma aningaasaqarnikkut piujuartitsinissaq pillugu apeqqutaavoq. Pisumi tassani avatangiisini aningaasaqarnikkullu piujuartitsinissap qaffasinnerulersinnissaa iluatsippoq. Tamanna Naalakkersuisut naammagisimaartorujussuuaat. Neriuutigaarput illoqarfinni erngup nukinganik innaallagissiorfeqartuni innuttaasut suli kiassaammik uuliatortumik atuisut, akigititat appasinnerat malugissagaat aammalu innaallagiamit kiassarnermik atuilissasut”, naggasiivoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund.

Innuttaasut amerlanerusut innaallagiamik kiassarnermik neqeroorfigineqassapput
Utoqqarmiut Kangerluarsunnguani innaallagissiorfiup allilerneqarnissaa aammalu Qasigiannguani Aasiannilu pilersuinermut erngup nukinganik innaallagissiorfiliornissaq pillugu sanaartornermut inatsisissamut siunnersuut Naalakkersuisut Inatsisartut Ukiaanerani ataatsimiinneranni saqqummiutissavaat. Inatsisissatut siunnersuut akuerineqassappat, innaallagissiorfiit nutaat illoqarfinni pingasuni taakkunani innaallagiamit kiassarnermik qaminneqarsinnaasumik periarfissaqarnerulissapput.

Nukissiamik ataavartumik atuinerup nunarput tamakkerlugu annertusitinnissaa Naalakkersuisut kissaatigaat, taamaalilluni innuttaasut amerlanerusut innaallagiamit kiassarnermut mingutsitsinngitsumut periarfissaqalissallutik. Inatsisartuni partiit qanimut oqaloqatigalugit aammalu avatangiisitigut aningaasaqarnikkullu piujuartitsinissaq ukkataralugu tamanna pissaaq.

Akigititat nutaat makkuupput:
Kiassarneq aalajangersimasoq
Kiassarneq aalajangersimasoq MWh-imut 740,00 koruuniniit MWh-imut 710,00 koruunimut appartinneqarpoq.
Kiassarnermi aalajangersimasumi ilaapput nalinginnaasumik ungasianiit kiassarneq aamma aalajangersimasumik innaallagiamit kiassarneq.

Kiassarneq qaminneqarsinnaasoq
Kiassarneq qaminneqarsinnaasoq MWh-imut 680,00 koruuniniit MWh-imut 490,00 koruuninut appartinneqarpoq.
Kiassarnermi qaminneqarsinnaasumi ilaapput inaallagiamit kiassarneq qaminneqarsinnaasoq aamma ungasianiit kiassarneq qaminneqarsinnaasoq.

Agguaqatigiissitsinermi atuisartoq

Nukissiorfiit paasissutissiipput innaallagiamit kiassarnermik qaminneqarsinnaasumik agguaqatigiissitsinermi kiassarnermik atuisup ukiumut kiassarnermut akiligassani 3.800,00 koruunit missaannik annikinnerulersut misigissagaa, sullitat innaallagiamit kiassarnermik aalajangersimasumik (innaallagiamik aamma ungasianiit kiassarneq) atuisut ukiumut agguaqatigiissillugu 600,00 koruunit missaannik annikillilerivigineqassallutik.

Attaveqarnissamut paasissutissat
Paasissutissanik annertunerusunik piniarnermi attaveqarfigineqassaaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisoqarfimmut pisortaaneq Mette Skarregaard Pedersen, e-mail: pan@nanoq.gl imaluunniit oqarasuaat 34 64 76.