Fasttrack-i utaqqisaasoq inissippoq

Fasttrack-i utaqqisaasoq inissippoq.
Naalakkersuisut Danmarkimilu Nunanut allanut nunasisullu qallunaanut ilanngutivinnissaannut ministeriaqarfik isumaqatigiinniarsimapput, fastrack-i pillugu isumaqatigiissummik, nunanit allaniit Kalaallit Nunaanni sulilersitsisinnaaneq pillugu.

Isumaqatigiissut inissippoq, septemberillu 24-ani 2021 atuutilissalluni.

Fasttrack-imik isumaqatigiissutip siunertaraa nunanit allaniit nunatsinni sulilersitsinissami periutsimik eqaallisaanissaq, nunanit allaniit sulisussanik aallertarnermi, nunatsinni suliffissaaleqisut ikileqqanerisa nalaanni.

Aaqqissuussinerup iluaniippoq najugaqarnissamut- aamma sulinissamut akuersissutip akuerineqarallarnissaa, sulilernissamut neqeroorut suliffeqarfimmiippat Namminersorlutik oqartussat allattorsimaffianni suliffeqarfiit akuerineqarallarsimasut ataanni. Tamanna isumaqarpoq qinnuteqartoq Kalaallit Nunaannukarsinnaasoq suliartorluni, nunamut angalasinnaasoq sulilerlunilu, Namminersorlutik oqartussat qinnuteqaammut akissutissaat utaqqeqqaanngikkaluarlugu. Aaqqissuussineq atuutissaaq piffinni suliffissaaleqinerup annikilleqqanerata nalaani.

Fasttrack-imik aaqqissuussineq unitsinneqarallarsinnaavoq suliffissaaleqinerup annertusiffiini, suliffeqarfiit nunatsinneersunik sulilersitsinissaannut ajornannginnerusinnaanerani.

Isumaqatigiissut akuersaarpaat
”Nuannerpoq danskit Nunanut allanut nunasisullu qallunaanut ilanngutivinnissamut ministeriat, Mattias Tesfaye naapillugu, marluullutalu isumaqatigiissummut akuersaarpugut, ministeriaata naapinngilaarnerani naammassisimasaanut. Fasttrack-imik aaqqissuussinikkut, Naalakkersuisut neriuutigivaat inuiaqatigiinni ineriartornerup siuariartorneranullu sunneeqataasinnaasoq. Nuannerpoq suliffeqarfiit nunanit allaniit sulisussanik amigaateqartut, sulisussaminnik amigaatigisaminnik sulilersitsisinnaanisaminnut periarfissaqalermata siornatigorniik sukkanerusumik” Isumaginninnermut Sulisoqarnermullu Naalakkersuisoq, Mimi Karlsen oqarpoq.

Qinnuteqarnermi periuseq
Namminersorlutik oqartussat suliffeqarfinnik akuerineqarallarsinnaasunik allattuipput. Allattuiffimmiissinnaanissamut piumasaqaataavoq, akissarsiat atorfeqarnermilu atugassat Kalaallit Nunaanni pissutsinut tulluuttuunissaat, taavalu sulinermi immikkut isigisariaqartunik peqarnissaa, soorlu immikkut ittumik amigaateqarneq.

Attavissaq / kontakt
Sukumiinerusunik paasissutissanik perusuttunut attavissaavoq naalakkersuisup allattaa Naja Lynge Petersen mailikkut: nlyp@nanoq.gl imaluunniit tlf. +299 34 56 11