Ataqqinartorsuaq Dronningi Kalaallit Nunaannut tikeraassaaq

Naalakkersuisut Siulitaasuata Múte B. Egedep qaaqqusineratigut Ataqqinartorsuaq Dronningi ulluni 8.oktoberimit 12. oktober 2021-imut tikeraartussanngorpoq. Dronningi ukioq manna julimi aggustimilu Kalaallit Nunaannut tikeraartussaagaluarpoq, inuiaqatigiinnili COVID-19-imik tunillaassuuttoqarnera pissutigalugu tikeraarnissaralua kinguartinneqarluni. Taarsiullugu Dronningi oktoberimi Ilulissanut, Nuummut, Pituffimmut Station Nordimullu tikeraartussanngorpoq.

Qeqertarsuup Tunuani Ilulissaniinnermini Ilulissat Kangiata Illorsua, qanittukkut atoqqaartinneqartoq issittumilu pinngortitap pissusaanik siammarteriviusussaq, UNESCO-llu nunarsuarmiut eriagisassaattut allattorsimaffianut ilanngunneqarnikuusoq Dronningip ilaatigut pulaassavaa. Issittumi ilisimasassarsiortartoq atuakkiortorlu Knud Rasmussen 1921-mi Thulemut tallimassaanik ilisimasassiornermi siuttuusoq Ilulissani inunngorsimavortaaq. Ilisimasassarsiornerup tusaamasap ukiut 100-t matuma siorna pisimanera dronningimit malunnartinneqassaaq ilaatigut Knud Rasmussenip illoqarfik inunngorfigisimasaata Ilulissat tikeraarneratigut.

Illoqarfiit pingaarnersaani Nuummi nerersuartitsinissami Naalakkersuisut qaaqqusisuussapput, Kalaallit Nunaatalu biskopeqarfiani nutaatut biskopiulersussap Paneeraq Siegstad Munk-ip Hans Egedep Oqaluffiani biskopinngortinneqarnerani Dronningi peqataasaaq. Dronningip Kalaallit Nunaanut tikeraarnera nunatsinni kunngip siullerpaamik tikeraarneranit ukiut 100-nngornerani pisussanngorpoq. Danskit kunngeqarfiani kunnginit siullersaalluni Dronningip aataava Christian 10. nunatsinnut 1921-imi tikeraarpoq, ukiullu 100-nngornerat dronningip Nuummi tikerarnerani piffinni assigiinngitsuni malunnartinneqassalluni. Tamatuma saniatigut Hans Egedep Kalaallit Nunaanut tikinneranit ukiut 300-nngoraat Ilisimatusarfimmi aaqqissuussinermi malunnartinneqalerpat Dronningi peqataassaaq.

Dronningip tikeraarnera naggaserlugu Kalaallit Nunaata avannaani Pituffimmi Thule Air Base kiisalu Station Nord namminerisamik tikeraarneqassapput.

Tusagassiorfiit Dronningip Ilulissani Nuummilu ulluni oktoberip 8.-nit 10.-anut tikeraarnerani ilanngutassiisarniarlutik peqataarusuttut piginnaatitsissummik qinnuteqarnermikkut ateq, atorfik, tusagassiorfiup atia attaveqarfissallu pillugit paasissutissanik ilalerlugit Siulitaasup Naalakkersuisoqarfiani Tusagassiuisarnermut Siunnersortimut uunga nassiussissapput; e-mail umat@nanoq.gl kingusinnerpaamik 30. september nal.12.00 tiguneqareersimassaaq. Nunatta avannaani tikeraarneq tusagassiorfitsigut peqataaffigineqarsinnaassanngilaq. Dronningip Kalaallit Nunaanni tikeraarnissaani pilersaarut sukumiinerusoq kingusinnerusukkut tamanut saqqummiunneqarumaarpoq.

Paasissutissat pillugit attaveqarfissaq: Uiloq Mathæussen, Naalakkersuisut Siulittaasuata Naalakkersuisoqarfiani tusagassiuisarnermut siunnersorti, oq. +299 345128 / +299 228502, e-mail umat@nanoq.gl