Inuiaqatigiinni nakuusertarneq unitsissavarput

Meeqqanut, Inuusuttunut Ilaqutariinnullu Naalakkersuisup, Mimi Karlsen, aamma Naligiissitaanermut Naalakkersuisup, Naaja Nathanielsen, meeqqanut inuusuttunullu atugarliortunut ilaqutariinni nakuusernermik eqqugaasuni peroriartortunut iliuuseqarneq annertusiniarpaat. Alliaq nakuusernermullu iliuusissatut pilersaarut nutaaq nakuusernermik akiuiniarnermi qitiupput.

Meeqqanut nakuuserneq unitsinneqassaaq. Angerlarsimaffinni nakuuserneq unitsinneqassaaq. Nakuuserneq unitsinneqassaaq. Meeqqat tamarmik nakuuserfigineqaratik pitsaasumik toqqissisimanartumillu meeraanissamut pisinnaatitaaffeqarput. Meeqqat tamarmik ersiornatik toqqissisimallutik angerlarsinnaassapput. Angerlarsimasinnaannginnertik pissutigalugu sapaatip akunnerata naanerani ikinngutinut, aanaakkunnut ornittakkanulluunniit qimarngussanngillat. Angerlarsimaffimmi nakuuserneq malunnaatilimmik Naalakkersuisunit iliuuseqarfigineqarusuppoq.

"Nakuusertarneq nungutissavarput, taamaammat inuit nakuusertartut allatut pissuseqalissapput. Qanoq pissusilersortarnerup allanngortinniarnera inunnut ataasiakkaanut ilungersunarsinnaavoq, qamanerisami taartoqarnera akuerisussaagami. Qaniginerpaasalli pisariaqartippaat", Meeqqanut, Inuusuttunut Ilaqutariinnullu Naalakkersuisoq Mimi Karlsen ilaqutariinnut angajoqqaanullu tamanut oqariartuuteqarpoq. Kamassaqarnermik nakuusertarnermilluunniit ajornartorsiuteqaraanni akeqanngitsumik nuna tamakkerlugu neqeroorummut 'Alliaq'-mut attaveqarnissamik Mimi Karlsen kajumissaarivoq.

Nakuusernerup inuiaqatigiinni ajornartorsiutigineqarnera annertusiartorpoq. 2018-imut sanilliullugu 2020-mi nakuusernermik nalunaarutiginninnerit marloriaataannik amerlassuseqarput. Ineriartorneq tamanna kukkunerusoq allanngortinneqassaaq.

Ilaqutariinnut nakuusernermik eqqugaasunut pitsaaliuilluni iliuuseqarnerit aalajangersimasumillu ikiuinerit qitiulluinnarput. Qanigisani nakuusernermut iliuusissatut pilersaarummik nutaamik Meeqqanut, Inuusuttunut Ilaqutariinnullu Naalakkersuisoqarfik taamaammat piareersaavoq. Iliuusissatut pilersaarummik ilusilersuinermi naleqquttumik suliaqartut tamarmik peqataatinneqassapput kiisalu Meeqqanut, Inuusuttunut Ilaqutariinnullu Naalakkersuisoqarfimmi inissisimassalluni. 'Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030' suliniummi aallaavigineqarpoq. Kalaallit Nunaanni meeqqat inuusuttullu amerlanerusut toqqissisimasumik atugassaqarlutik peroriartorsinnaaqqullugit qanigisaasuni nakuusernerup pitsaaliorneqarnissaanut Naalakkersuisut siunnerfilimmik siunissamullu ungasinnerusumut sulinissaannik taanna qulakkeerinnissaaq. Iliuusissatut pilersaarutit tarnikkut timikkullu nakuusernermut kiisalu kannguttaatsuliortumik pissusilersornernut sunulluunniit sammisunik iliuusissanik ilaatigut imaqassaaq.

"Qaniginerpaasavit pisariaqartippaat. Inuiaqatigiit pisariaqartippaat. Illit pisariaqartippat", Naalakkersuisunut ilaasortat Mimi Karlsen aamma Naaja Nathanielsen oqarput.



Attavissaq
Paasisaqarnerunissamut attavigineqassaaq Naalakkersuisup allattaa Naja Lynge Petersen: e-mail: nlyp@nanoq.gl imaluunniit oq. + 299 27 02 43.