Tasiilaq: Imigassanik aalakoornartortalinnik matusigallarneq

Naalakkersuisut ullumi tallimanngornermi aalajangerput; Tasiilami, nunaqarfinnilu Tasiilap eqqaaniittuni imigassanik aalakoornartortalinnik niuerneq sassaalliinerlu septembarip ulluisa 17-at ilanngullugu unitsinneqarallassasoq. Tamanna Kommuneqarfik Sermersuup Naalakkersuisunut saaffiginninnerata kingorna pivoq.

Taamak aalajangerneq ilaatigut peqqinnissaqarfimmiit saaffiginnittoqarsimaneranik patsiseqarpoq. Ulluni kingullerni Tasiilami imigassartortoqarsimatillugu napparsimmavimmut unitsitaasartut pisarnermit amerlanerusimapput, taamaattoqarneralu napparsimmaviup sulineranut artukkiisimavoq malinnaaniarnerlu ajornarsimalluni.

Aalakoornartortalinnik tuniniaaqqusaajunnaarneq sassaalleeqqusaajunnaarnerlu maannakkorpiaq atuutilertumik pivoq.

Kommuneqarfik Sermersuup kissaataa Naalakkersuisut malinniarlugu aalajangerput; Naalakkersuisummi kommunip ernumassutai aamma ernumanartutut isigaat, peqqissutsimut naalakkersuisoq Kirsten Fencker oqarpoq, nangillunilu;

Sumiiffimmi pineqartumi siunissaq ungasinnerusoq eqqarsaatigalugu susassaqartut peqatigalugit aaqqiissutissanik ujartuinissamut Naalakkersuisut ammapput.

Paasissutissat sukumiinerusut pillugit naalakkersuisup allattaa Kirsten Nystrup attavigineqarsinnaavoq oqarasuaammut 34 66 902 imaluunniit email kirn@nanoq.gl.