Kalaallit Nunaata ammaateqqinnissaanut siunissamut ungasinnerusumut pilersaarut Naalakkersuisunit saqqummiunneqarpoq

Naalakkersuisut Kalaallit Nunaata ammaateqqinnissaanut siunissamut ungasinnerusumut pilersaarusiorniarlutik aalajangerput. Taanna Inatsisartuni partiit siulittaasui qanittumik suleqatigalugit suliarineqarpoq. Tikittartut amerlassusiisa qaffatsikkiartuaarnissaat, tikittartut tamarmik tikinnginnerminni misissortissimanissaannik piumasaqaatip atuutiinnarnissaa aamma tikittut COVID-19-imut akiuussutissanik kapuinermi naammassinnissimanngitsut tikinnerminni angerlarsimaannarnissaannut misissorteqqinnissaannullu piumasaqaatip atuutiinnarnissaa isumaqatigiissutigineqarput. Aamma akiuussutissanik kapuinerup akulikinnerunissaalu partiit isumaqatigiissutigaat.

Siunissamut ungasinnerusumut ammaaqqinnissamut pilersaarummi Kalaallit Nunaata sapinngitsumik tuniluuffiunnginnissaa, tamatumalu peqatigisaanik innuttaasut inuussutissarsiortullu nunatta pitsaanerusumik ataqatigiinnissaanut kissaateqarnerat tunngavigineqarput. Ammaaqqinnissamut pilersaarummi immikkoortut pingaarnerit tassaapput:
  • 6. septembari 2021 aallarnerfigalugu sapaatit akunnerannut Imarpik qulaallugu angalasartut 1500-nut amerlineqassapput, ullumikkut 1000-usimagaluarlutik. 
  • Silaannakkut angallatinut ilaasinnaasut amerlassusii pillugit nalunaarut 1. oktobari 2021-mi atorunnaassaaq. Taamaalilluni tikittartut amerlassutsimikkut killilersorneqarunnaassapput. 
  • Kalaallit Nunaannut tikinnginnermi COVID-19-imik tunillatsissimannginnermut uppernarsaateqarnissamik piumasaqaat tikittartunut tamanut sivikinnerpaamik 31. decembari 2021 ilanngullugu atuutsiinnarneqassaaq. Maleruagassanik allannguinermi maanna nalunaaquttap akunnerinik 72-inik pisoqaassuseqarnissaa piumasarineqalerpoq, siornatigut nalunaaquttap akunneri 48-usimagaluarlutik.
  • Kalaallit Nunaannut tikinnermi angerlarsimaannarnissamut misissorteqqinnissamullu piumasaqaat tikittunut, COVID-19-imut akiuussutissanik kapuinermi naammassinnissimanngitsunut sivikinnerpaamik 31. decembari 2021 ilanngullugu atuutsiinnarneqassaaq.
  • Kalaallit Nunaannut tikittussanut tamanut immersugassamik Sumut-mik immersuinissamut piumasaqaat sivikinnerpaamik 31. decembari 2021 ilanngullugu atuutsiinnarneqassaaq.
  • Maani najugaqanngitsunut tikinnermi Covid-19-imut akiuussutissanik kapuinermi naammassinnissimanissamut piumasaqaat sivikinnerpaamik 31. decembari 2021 ilanngullugu atuutsiinnarneqassaaq. Kapitinneq kingullermiit ullut 14-nit qaangiuppata tamakkiisumik akiuussuserneqarsimasutut isigineqalissaaq. Tamanna uppernarsarsinnaasariaqarpoq.
  • Tunillatsissimasunik ujartuinermi suliniutit sivikinnerpaamik 31. decembari 2021 ilanngullugu ingerlaannassapput.
  • Attaveqaqatigiinneq atuisinnaanerlu eqqarsaatigalugit akiuussutissanik kapuinermi pilersaarut annertusineqassaaq.

Naalakkersuisut partiit siulittaasui suleqatigalugit ineriartorneq qanittumik malinnaaffiginiarlugu aammalu pisariaqalissappat pilersaarut iluarsiiffiginiarlugu oqaloqatigiissutigaat.