Qaqortumi nutaamik mittarfiliornerup inuiaqatigiit aningaasaqarnerannut kingunerisassanik naliliinerup tamanut ammasumik saqqummiunneqarnissaa

Naalakkersuisoqatigiit mittarfiliortiternerit pillugit ammasumik pissuseqarnissaminnut neriorsuuteqarsimapput. Taamaattumik aasaanerani sulinngiffeqarnissaq sioqqullugu ” Mittarfiliortiternerit aamma Kalaallit Airports International A/S-ip aningaasaatinut aningaasaliiffigeqqinneqarnissamut pisariaqartitsinera pillugu nassuiaat” tamanut ammasumik saqqummiunneqarpoq. Maanna Qaqortumi mittarfiliornermi inuiaqatigiit aningaasaqarnerannut kingunerisassanik naliliineq pillugu nassuiaat nutartigaq, politikkikkut oqallinnermut aamma Qaqortumi mittarfiliornissaq pillugu aalajangiinissamut tunngaviliisussaq malinnaatinneqarpoq.

 

Nassuiaammi allaaserineqartutut suliassamut neqeroorutit tiguneqartut akimikkut sanaartornermi missingersuutitut pilersaarutigineqartunit 669 mio. koruuniusunit qaffasinnerungaatsiarput. Tamanna tunngavigalugu itisiliilluni misissuinissaq tunngavissinneqarpoq.

 

Qaqortup mittarfissaa pillugu nalunaarusiaq tunngavigalugu maanna ilisimasatigut tunngaviusut nutartikkat tunngavigalugit politikkikkut oqallittoqartussanngorpoq. Nalunaarusiami periarfissat ilisimaneqareersut mittarfiit takissusissaatut qinigassanut allanut sanilliunneqarput.

 

Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq:

 

”Tallimanngormat Aggustip 27-anni misissueqqissaarnermi inerniliinerit Kommune Kujallermi borgmesterimut aamma kommunalbestyrelsimut saqqummiuppakka. Tamatuma saniatigut kommunip, Naalakkersuisut Inatsisartullu oqalliseqatiginerinik ingerlatitseqqinnissannut qilanaarpunga. Suliassami maanna aalajangiisoqartussanngorpoq. Aalajangiineq ukiuni qulikkaani tulliuttuni Kalaallit Nunaata kujataani ulluinnarni inuunermut sunniuteqartussaavoq, taamaattumillu suliap inernera qanorluunniit isikkoqaraluarpat isummersuutit assigiinngitsut paasineqarnissaat pisariaqarpoq. Tamanna ajornakusuussaaq, kisiannili iliuuseqannginnissaq periarfissaanngilaq”.

 

Uani atuaruk: Qaqortumi nutaamik mittarfeqalernerani inuiaqatigiit aningaasaqarnerannut sunniutaasussanik nalilersuineq

 

Annertunerusumik paasisaqarusunnermi Ineqarnermut, Attaveqaasersuutinut Naligiissitaanermullu Naalakkersuisoqarfik box909@nanoq.gl aqqutigalugu attaveqarfigineqassaaq.