Akileraaruserisoqarfimmit suli utertuunngilatit?

Innuttaasorpassuit e-Boksikkut nalunaarfigineqarsimapput 2020-mi akileraarpallaarsimallutik. Innuttaasulli ilarpassui tassanngaanniit suli utertoorsimanngillat. Tamakku internetikkut immersuiffissakkut aningaaserivimmi kontuminnik paasissutisseeqqullugit kaammattorneqarput.

Innuttaasut 2020-mi nammineerlutik nalunaarsuinerminni aningaaserivimmi kontuminnik paasissutissiisimasut augustip naanerani akileraarutinik akiliivallaarnerminnit utertoorsimapput. Innuttaasulli 13.000-it missaanniittut utertoorutissaat unitsinneqarallarsimapput, tassami Akileraartarnermut Aqutsisoqarfimmi tamakku aningaaserivimmut tunngatillugu paasissutissat amigaatigineqarmata. Taamaattumik innuttaasut tamakku internetikkut immersuiffissamik immersueqqullugit kaammattorneqarput, taamaalillutik aningaasat piaarnerpaamik nuunneqarsinnaaniassammata.

 

Akileraarutinik akiliivallaarsimaninnit suli utertoorsimanngikkuit taava ajornanngitsunnguamik internetikkut immersuiffissakkut ugguuna aningaaserivigisat pillugu paasissutissiisinnaavutit.

 

Naatsorsuutigisannit aningaasanik ikinnerusunik utertoorsimaguit tamanna pisortanut akiitsunnik ilanngaassivigineqarsimaninnit pissuteqarsimasinnaavoq. Innuttaasut akileraarutinik akiliivallaarsimasut utertoorutissaat akiligassanut kinguaattoorutinut matussutissatut atorneqarsimappata taava e-Boksimikkut ilanngaassivigineqarnertik pillugu allagarsinikuupput.

 

Siunissaq tassaavoq Nemkonto

Ukioq manna kingusinnerusukkut NemKonto-p nunatsinni atuuttussanngortinneqarnissaa naatsorsuutigineqarpoq. NemKonto aningaaserivimmi kontuuvoq pisortat aningaasanik ikisiffigisartagassaat. Akiliutigineqartut tamarmik ilaatigut kommunimit imaluunniit Namminersorlutik Oqartussanit tapiissutit, meeqqanut tapit, utoqqalinersiutit, ilinniagaqarnersiutit akileraarutinillu akiliivallaarsimanernit utertoorutit Namkonto-kkut akilerneqartassapput.

 

Taamaalilluni pisortat innuttaasunut pissaqartitsigaangamik akiliisarnissaat ajornannginnerujussuanngussaaq.

 

Siumoortumik naatsorsuisimanitit misissukkit

Naak aningaasanik utertoorluni nuanneraluaqisoq tamanna illit innuttaasutut ukiup ingerlanerani akileraarutinik akiliivallaarsimaninnut takussutissaavoq. Isertitavit allanngorneranni siumoortumik nalunaarsukkatit ingerlaavartumik misissortassagitit Akileraartarnermut Aqutsisoqarfimmit kaammattuutigineqarpoq. Taamaalillutit ukiup ingerlanerani akileraarutinik akiliivallaannginnissat akiliinikippallaannginnissallu nammineq qulakkeersinnaavat.

 

 

 

 

 

 

 

Akileraartarnermut Aqutsisoqarfimmit allakkat e-Boksikkut nassiunneqartarput

1. januaari 2021-mi pisortat allakkanut digitaliusunut nuupput. Tassa imaappoq siunissami kikkut tamarmik Sullissivik.gl-kkut aamma e-Boksikkut pisortanit saaffiginnissutinik tigusaqartalersissasut. e-Boks atorsinnaassagukku NemID-mik peqassaatit. NemID-eqanngikkut Kommunimi Innuttaasunik Sullissivikkut aningaaserivikkulluunniit NemID-mi akeqanngitsumik pisinnaavutit.

 

Innuttaasut 1950 sioqqullugu inuusimasut allallu allakkanik digitaliusunik pisartagartussaanngitsut Akileraartarnermut Aqutsisoqarfimmit allakkerivikkut suli allagarsisassapput.

 

Sullissivik.gl-imi allakkat digitaliusut paasisaqarfiginerusinnaavatit.

 

 

 

 

Siuliani allassimasunut apeqqutissaqaruit (innuttaasunit)

Attaveqarfissat; Akileraartarnermut Aqutsisoqarfik, Intaleeqqap Aqqutaa 1, Postboks 1605, 3900 Nuuk, oqarasuaat + 299 34 65 10, mail: tax@nanoq.gl.