Kuannersuit pillugu innuttaasunik ataatsimiititsereernerup kingorna: Avatangiisinut sunniutaasussat pillugit innuttaasunit oqariartuutigineqartut pitsaasorpassuit

Naalakkersuisunut ilaasortat marluk aamma atorfilittat arlallit Kuannersuit pillugu innuttaasunut ataatsimiititsinerni internetti aqqutigalugu peqataapput. Internetti aqqutigalugu peqataaneq aningaasanik sipaaruteqarfiuvoq, peqatigisaanillu innuttaasut qanimut oqaloqatigineqarnissaat qulakkeerneqarluni.

Kuannersuarni suliassamut atatillugu Kujataani sumiiffinni assigiinngitsuni arfinilinni innuttaasunik ataatsimiititsinerit sapaatit akunneranni kingullermi ulluni 23.–28. aggusti ingerlanneqarput. Aningaasartuutinik sipaarnissap kissaatigineqarnera kiisalu Naalakkersuisut piffissami COVID-19-ip aarlerinaateqarnerani angalasut ikilisinnissaat tunngavigalugit Naalakkersuisut sioqqutsisumik angalaqataasussat amerlassusissaasa killilernissaat aalajangiutereersimavaat. Taamaattumik Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund aamma Peqqinnissamut Naalakkersuisoq, Kirsten L. Fencker internetti aqqutigalugu peqataapput.

-          Innuttaasut toqqaannartumik naapillugit tamatigut nuannernerpaasarpoq, kisianni Kuannersuit pillugu innuttaasunik ataatsimiititsinerni internetti aqqutigalugu peqataanerput ingerlalluarpoq. Naalakkersuisut innuttaasunit oqariartuutinik apeqqutinillu pitsaasorpassuarnik apuussiffigineqarput aammalu oqaloqatigiinneq pitsaasuulluni. Innuttaasunit oqariartuutigineqartorpassuit pingaaruteqarput, taakkualu suliap ingerlaqqinnerani ilanngutissavagut, oqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund.

 

-          Nunami nunatsitut ittumi isorartoorujussuarmi internetti aqqutigalugu innuttaasunik ataatsimiititsinernut allanut periarfissaqartoq takusinnaavara. Naalakkersuisuni aningasartuutitta appasitsinnissaat pingaaruteqarpoq, aammalu attaveqaqatigiinnermut atortut nutaaliaasut atorlugit nunatut qaninnerusumik ataqatigiissinneqarsinnaavugut – aamma ornigulluta najuussinnaatigata.

 

ASN pillugu piumasaqaat inatsimmi aalajangersagaavoq, aammalu ASN-imut piumasaqaat taanna aatsitassarsiorluni ingerlatassanut isummersinnaanissatsinnut aamma avatangiisinut sunniinissamut maleruagassiinissanut tunngatillugu pingaaruteqarpoq. ASN-imut nassuiaat ingerlatseqatigiiffimmit suliarineqartussaavoq aammalu avatangiisinut ajornartorsiutaasinnaasut aatsitassarsiorluni ingerlatap malitsigisinnaasai tamaasa, aammalu taakkua ajornartorsiutit qanoq annikillisinneqarsinnaanersut pitsaaliorneqarsinnaanersullu nassuiarneqartussaallutik. ASN-imik suliaqarnerup ingerlanerani pingaaruteqartoq tassaavoq, ASN-imut nassuiaatip tamanut ammasumik tusarniaassutigineqartussaanera. Tamanna innuttaasut, kommunit soqutigisaqaqatigiiffiillu ASN-imut nassuiaammut apeqquteqarsinnaanissaannut oqaaseqarsinnaanissaannullu qulakkeereqataavoq.

Kuannersuarni suliassamut tunngatillugu tusarniaanermut killiliussaq tassaavoq ulloq 13. septembari. Tusarniaanermut najoqqutassat atuarneqarsinnaapput uani.

Paasissutissanik annertunerusunik piniarnermi attaveqarfigineqassaaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisoqarfimmut pisortaaneq Mette Skarregaard Pedersen oqarasuaammut: 346476 / 529844 imaluunniit e-mail: mesp@nanoq.gl imaluunniit pan@nanoq.gl