Ittoqqortoormiit timmisartuussivigineqarnerata pitsaanerulersinneqarnissaa

Coronap tuniluunnera peqqutigalugu Ittoqqortoormiinut sapaatit akunnikkaartumik Island aqqutigalugu timmisartuussinerit akulikissusii, sapaatit akunnerannut marluusimasut ataatsimik ilanngarneqarput.

 

Tamatuma kingunerisaanik maannarpiaq timmisartuussinerit qaammammut nalinginnaasumik sisamaannanngorsimapput. Timmisartuussinerit sisamaasut tamarmik ullumikkut Nerlerit Inaata aamma Islandimi Akureyri-p akornanni ingerlanneqarput. Ilaasoq Nuummut ingerlaqqiffissani angumeriniarlugu nammineerluni Akureyri-miit Reykjavik-imut imaluunniit Keflavik-imut ingerlaqqittussaavoq.

 

Septembarimiit pitsannguisoqassaaq

Ukioq manna septembarimiit aallarnerit allortarlugit Nerlerit Inaanniit Akureyri-mut timmisartuussinani Reykjavik-imut timmisartuussisoqartalissaaq. Taamaalilluni sapaatit akunneri allortarlugit ilaasut Nuummut ingerlaqqinniarlutik Akureyri-miit mittarfimmut allamut namminneerlutik angalasariaarutissapput. Tamatuma saniatigut Icelandair-ip angallavii angallavinnut Nuummut, Kulusummut Europamullu timmisartuussinissamut periarfissiiffiusunut atasunngorlugit eqqarsaatigineqassapput.

 

Ineqarnermut, Attaveqaasersuutinut, Aatsitassanut, Inatsisinik Atortitsinermut Naligiissitaanermullu Naalakkersuisoq Naaja H. Nathanielsen tamatumunnga atatillugu imatut oqaaseqarpoq:

 

”Assartuussinerit innuttaasunut ajornannginnerulernissaat Naalakkersuisunit pingaartinneqarpoq. Kiffartuussinermut isumaqatigiissummi atuuttumi Ittoqqortoormiini innuttaasut, isorartuumi inissisimanertik aqqutaanilu amerlasooriarlutik unittarnertik peqqutigalugu immikkut unammillertinneqartut angalasarnerisa eqaallisaavigineqarnissaat periarfissaqarpoq, periarfissarlu taanna aallartinniarlugu aalajangerpugut.”

 

Ilinniarfissuarmi ilinniartut ilinniarnerup aallartinnginnerani Nuummut angallannissaat unammilligassanut ilaavoq.

 

Ineqarnermut, Attaveqaasersuutinut, Aatsitassanut, Inatsisinik Atortitsinermut Naligiissitaanermullu Naalakkersuisoq Naaja H. Nathanielsen tamatumunnga atatillugu imatut oqaaseqarpoq:

 

 

”Suleqatiga Ilinniartitaanermut, Kultureqarnermut, Timersornermut, Ilageeqarnermullu Naalakkersuisoq suleqatigalugu Ittoqqortoormiiniit ilinniarfissuarmi ilinniartut aggustimi ilinniarnerup aallartinnginnerani Nuummut apuunnissaat qulakkeerneqarpoq. Qujanartumik oqartussaasut sullissisullu suleqatigiinnerisigut ilinniartut angalanissaat qulakkeerneqarpoq. Unammilligassaq toqqissisimajunnaarsitsisimavoq, kisiannili pissutsit pillugit immikkut ittumik aaqqiisinnaasimanerput nuannaarutigaara.”

 

Ineqarnermut, Attaveqaasersuutinut Naligiissitaanermullu Naalakkersuisoqarfiup 2021-mi ukiakkut aningaasanut inatsimmi sinaakkusiussat iluanni Ittoqqortoormiinut Ittoqqortoormiiniillu assartuussinerup eqaannerulerseqqinneqarnissaa misissuiffiginiarpaa.

 

Ineqarnermut, Attaveqaasersuutinut, Aatsitassanut, Inatsisinik Atortitsinermut Naligiissitaanermullu Naalakkersuisoq Naaja H. Nathanielsen tamatumunnga atatillugu imatut oqaaseqarpoq:

 

”Siunissaq ungasinnerusoq eqqarsaatigalugu Ittoqqortoormiini mittarfiliornissaq pillugu suliassaq, illoqarfimmut toqqaannartumik attaviliisussaq, taamaalillunilu Ittoqqortoormiit aamma Nerlerit Inaata akornanni qulimiguullip angallaveqarnissaanik pisariaqartitsinermik atorunnaarsitsisussaq Naalakkersuisut ingerlateqqinniarpaat. Aammalu soorunami nuannaarutigaarput, Tunumut timmisartuussinerit annertunerusumik ammaannerisigut Ittoqqortoormiinut sapaatit akunnerannut timmisartuussinerit marlunnut amerliseqqissinnaagatsigit.”

 

 

Annertunerusumik paasisaqarusunnermi Ineqarnermut, Attaveqaasersuutinut Naligiissitaanermullu Naalakkersuisoqarfik box909@nanoq.gl aqqutigalugu attaveqarfigineqassaaq.