Asii Chemnitz Narupip qaleralinnut pisuussutinit akileraarummut tunngatillugu KNAPK-mut oqaaseqaataa

-    KNAPK-p Naalakkersuisut aningaasaqarnermut inatsisissatut siunnersuutaa isornartorsiorpaa. KNAPK-lli aningaasaqarnermut inatsisissatut siunnersuummi tunngaviit assigiinngitsut eqqarsaatiginngilai.

-    Erseqqissassallugu pisariaqartippara, Naalakkersuisut aningaasaqarnermut inatsisissatut siunnersuut saqqummiunneqartoq ataatsimoorlutik suliarisimagaat. KNAPK ilisimareerneratuut, Aalisarneq pillugu Ataatsimiititaliarsuaq massakkut isumaliutissiissutiliorpoq. Tamanna Naalakkersuisut, aalajangigassanut nunatsinni aningaasatigut pingaassusilinnut tunngatillugu, kiisalu piffissaq ungasissumi sunniuteqarsinnaasunut tunngatillugu aalajangiisoqannginnerani misissueqqissaartoqarnissaa pisariaqartippaat. Maanna aalisarnermut pisuussutinit akileraarutip, tassunga ilanngullugu sinerissap qanitaani qaleralinniarnermut pisuussutinit akileraarutip, allanngorneqarnissaanut tunngatillugu Aalisarneq pillugu Ataatsimiititaliarsuup isumaliutissiissutaa utaqqineqarpoq.

-    Taamaammat pisuussutinit akileraarummut apeqqut attuumassutimini, tassa aalisarnermi ataatsimut isigineqartariaqarpoq. Naalakkersuisut qaammatit arlaliinnaat Naalakkersuisuunerat pissutigalugu Aalisarneq pillugu Ataatsimiititaliarsuup isumaliutissiissutaa utaqqissallugu pisariaqarpoq.

-    Isumaliutissiissutip imarisai ilisimaneqalerpata, Naalakkersuisut aalisarnermik, partiit akornanni, aaqqissuussaanernik aamma inuussutissarsiornermik tamatuma inernerata aamma periarfissartaata killissartaatalu oqaloqatiginninnissamik qilanaarput.

-   Tamatuma saniatigut akileraarusiinermik aamma akitsuutinik aaqqissuussinissamut suliaqartoqartoq ilisimatitsissutigissavara. Suliap taassuma aalisarneq aamma sunniuteqarfigisinnaavaa. Naalakkersuisut pilersaarutaat piffissaq ungasissumut isiginnippoq. Taamaammat aalisarnerup ineriartornera, isumaginninnermi aaqqissuussinerit, nunatta aningaasaqarnikkut soqutigisai kiisalu naligiinnerujartorneq ataatsimut isigineqartariaqarput, massakkulli suliassaq suli ingerlammat tamanna qanoq issanersoq sukumiinerusumik itisilersinnaanngilara.

-    Naggasiullugu erseqqissaatigissavara, uagut Naalakkersuisut aalisarnermik oqaloqatiginninneq, tamatumunnga ilanngullugu KNAPK qujagaarput. Aningaasaqarnermut inatsisissatut siunnersuut siunnersuutaannaagallartoq aamma erseqqissaatigissallugu pisariaqarpoq. Taamaammat, siunnersuutip imarisai pillugit aamma siunnersuutinik allanik politikikut isumaqatiginninniartoqassavoq, tamannalu aningaasanut inatsisissap allanngorneranut kinguneqarsinnaalluni.

 

 

 

 

            Attavigisassaq:

 

            Per Aksel Petersen (Aningaasaqarnermut Naalakkersuisoqarfik)

            /direkte 345108

            peap@nanoq.gl