Saqqummersitaq: Utoqqarnut suliassaqarfinni paasissutissat

Qanoq utoqqaatigilersarpugut. Utoqqaliartortut utoqqaanerillu sumi najugaqarpat? Qanoq qaqugulu nuuttarpugut? Qassit utoqqalinersiaqalertarpat? Innuttaasut amerlanerit Danmarkimut nuuttarpat ukioqqortusigaangamik? Apeqqutit isumaliutillu tamakku ukiuni kingullerni utoqqaat pillugit oqallinnermi saqqumipput.

Saqqummersitap ”Utoqqarnut suliassaqarfinni paasissutissat” siunertaraa paasissutissanik utoqqaliartortut utoqqaanerillu aningaasaqarneranut tunngasunik paasissutissiinissaq. Saqqummersitami allaaserineqassapput pissutsit atuuttut atuuttussallu pingaarnerpaartaat utoqqarnut attuumassutillit. Saqqummersitami kisitsisit pingaarnerit graf-illu saqqummersinneqartut takutippaat qanoq pisoqarsimanera siunissamilu qanoq naatsorsuutigisaqarsinnaanersugut.

”Utoqqarnut tunngasut Naalakkersuisut pingaartitarilluinnagaasa ilagaat. Ukiuni tullinnguuttuni arlalinni utoqqarnut tunngasut sulissutigivinniarpagut. Aalajangiinissatsinni pingaarluinnarpoq paasissutissanik  aallaaveqarnissarput”, Isumaginninnermut Sulisoqarnermullu Naalakkersuisoq Mimi Karlsen oqarpoq nangillunilu: ”Paasissutissat arlaannut utoqqarnut tunngasunut tupaallaateqalaarpunga. Ima isumaqartoqarpoq, inuit ukioqqortusigaamik Kalaallit Nunaannit nuuttoqartartoq. Qujanartumik takusinnaavarput, inuit 50-ileereersut ikittuinnaat nuuttartut. Kalaallit Nunaat utoqqaliartorfigissallugu ajunngitsuusoq tamassuma takutikkaa isumaqarpunga. Utoqqaat tamarmik inuuniarnermikkut atugassarisaat naammaginngilara, Naalakkersuisullu pimoorullugu suliariniarpaat utoqqaat inuuniarnermikkut atugaat pitsanngorsarniarlugit, tamaalilluni kikkut tamarmik utoqqaligunik ajunngitsumik inuuniassammata.”

Kisitsisit statistikkillu amerlanerpaartaat Kalaallit Nunaata Naatsorsueqqissaartarfianeerput, Kalaallit Nunaat pillugu aningaasanut Siunnersuisoqatigiiffianeerput, Inunnik Isumaginninnermut Sulisoqarnermullu Naalakkersuisoqarfimmeerlutik uanilu takuneqarsinnaapput www.stat.gl



Saqqummersitaq uani atuarneqarsinnaavoq.


Attavissaq

Paasissutissat sukumiinerusut pissarsiariniaraanni naalakkersuisup allattaa Naja Lynge Petersen attaviguuk ugguuna:
nlyp@nanoq.gl imlt oqaras., +299 34 56 11