Tikaagullit 2020-imi pisarinngitsuukkatut nuutat piniarneqarnerat unitsinneqarpoq

Kitaani

Tikaagulliit 2020-mi pisarinngitsuukkat 55-it 2021-mut nuunneqartut ingerlaannartumik piniaqqusaajunnaarput. 2020-mi pisassiissutini pisarineqanngitsutut nuutat Kitaani maanna nungupput.

 

Tunngaviusumik 2021-mi tikaagullittassat 164-it qamutilissortunut umiatsiaararsortunullu agguaassat allannguuteqanngillat decembarip 17-iani 2020-imi tusagassiorfitsigut nalunaarutikkut nalunaarutigineqartut. Qamutilissortunut 100-t umiatsiaararsortunut 64-t.

 

Aggustusip 17-iani 2021-mi APN-ip tikaagullissimanermut nalunaarutit 2021-mi pisassiissutiniit pisarineqarsimasutut nalunaarutit 35-t tigusimavai. 2021-mut pisassiissutiniit kommunit ataasiakkaat aqutsiveqarfimminni agguaassisimaneratuut ingerlaannassaaq. Tikaagulliit suli 117-inik sinneqarput, taakkunannga 65-it angallatinit qamutilissortunit pisassaallutik aammalu 52-t umiatsiaararsorlutik piniaqatigiinnissamut (agguaanneqareersut).

 

Angallatit kiisalu ataatsimoorluni tikaagullinniarnissamut teknikikkut piumasaqaatinik nalunaarutini ataani taaneqartunik naammassinnissimasutut akuerineqarsimasut nalunaarut atuuttoq malillugu januarip aallaaqqaataaniit decembarip 31-ianut tikaagullinniarsinnaapput.

 

Tunu

2020-imi Tunumi tikaagullittassiissutit 2-nik sinneqarsimapput tikaagulliillu marluk sinnerussimasuniit juunip 23-iani 2021-miit nuunneqartut suli pisarineqarsinnaapput. Tunumi umiatsiaararsortunut ammaanneqarnikuupput. Piniarnermi malittarisassat atuuttut malillugit aammalu akuersissuteqaqqaarnissamut piumasaqaat ilanngullugu atuuppoq.

 

Tusagassiorfitsigut decembarip 17-iani 2020-mi nalunaarutigineqartut tunngaviusumik pisassiissutit agguaanneqartut aqutsiveqarfinni allannguuteqanngillat. Aggustusip 17-iani 2021 Tunumi tikaagulliit 10-t pisarineqarsimasutut nalunaarutigineqarput, sinneruppullu 10-t kiisalu 2020-imi pisarineqanngitsoortut ilaat marluk, katillugit 12-t.

 

Ataatsimoorussamik tikaagullinniarnissamut teknikikkut piumasaqaatinik nalunaarutini ataani taaneqartunik naammassinnissimasutut akuerineqarsimasut januaarip aallaqqaataaniit decembarip 31-ianut tikaagullinniarsinnaapput.

 

Piniarnissani piumasaqaatit (www.inatsisit.gl)

Arfernik angisuunik piniarneq ingerlanneqassaaq takuuk:

  • Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 9, 6. december 2018-imeersoq
  • Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.

 

Pisarinngitsuukkat pillugu nassuiaat

Pisarinngitsuukkanik nuussinermi (carry-over) periaaseq IWC-mi ataatsimiinnermi kingullermi (IWC 67, septembari 2018) akuerineqartoq malinneqassaaq.

 

Malugeqquneqarpoq Kalaallit Nunaata Kitaani pisarinngitsuukkanik nuussisinnaanermi killissarititaasoq tikaagullinniit 15-niit ukiumut pisassiissutaasunit 164-sunit 50%-mut qaffanneqartoq, tassalu annerpaamik tikaagulliit 82-it nuunneqarsinnaallutik. Ilisimatuussutsikkut ataatsimiititaliap nalunaarutigereerpaa nuussisinnaanermi killissarititaasumik qaffaaneq pineqartoq piujuaannartitsinermut kinguneqassanngitsoq. Kalaallit Nunaata Kitaani pisassiissutinik pisarinngitsuukkanik nuussinermi amerliliisinnaanermut ukioq aallartiffiusoq 2018-iuvoq.

 

Malugeqquneqarpoq Tunumi pisarinngitsuukkanik 2019-imi aamma 2020-mi nuussisinnaaneq tikaagullinnut 3-nut killeqarmat. Taassuma kingorna pingasuniit ukiumut pisassiissutaasunit 20-sunit 50 %-mut qaffanneqassammat, tassa amerlanerpaamik 10-t (2021-miit atuutilissaaq). Ilisimatuussutsikkut Ataatsimiititaliaq nalunaaruteqarpoq taanna nuussisinnaanermut qaffaaneq uumasoqatigiit amerlassusaannik innarliinavianngimmat. Tunumi pisassiissutinik pisarinngitsuukkanik nuussinermi amerliliisinnaanermut ukioq aallartiffiusoq 2020-uvoq.

 

Kalaallit Nunaanni arferit anginerit pisassat Arfanniarnermut Ataatsimiititaliarsuup (IWC), pisassiissutinik aalajangiisartuusup, inassuteqarnera tunngavigalugu aalajangersorneqartarput. Ataatsimoortumik ukiunut 7-nut atuuttumik tikaagulliusaanik, arfivinnik, qipoqqanik Kitaanilu tikaagullinnik aammalu Tunumi tikaagullinnik pisassiissutit 2019-2025-imut atuupput. Ukioq pisassiiffiusoq naagaangat nalilersuineqartartussaavoq, ukiumut tullermut pisassiinissamut nutaamik inassuteqaateqartoqarsimassagaluarpat pisassanillu qaangiisoortoqarsimanersoq nalilersorlugu.

 

 

Sukumiinerusumik paasisaqarusukkaanni immikkoortortaqarfimmi pisortaq, Aalisarnermut Piniarnermullu Naalakkersuisoqarfik, Amalie Jessen attavigiuk, oqarasuaat 34 53 04, e-mail: amalie@nanoq.gl