Tunillatsittut nutaat 16-it – tunillatsissimasunit marluk utoqqaat angerlarsimaffianneersuupput

Ullup unnuallu kingulliup ingerlanerani Coronavirusimik tunillatsissimasut 16-inik ilapput. Taakkunannga qulit Sisimiuneersuupput, tallimat Upernavimmeersuupput ataaserlu Nuummeersuulluni.

Sisimiuni inuit qulit tunillatsissimapput, taakkunanngalu amerlanersaat suminngaanneernersoq ilisimaneqanngilaq. Tassalu suli illoqarfimmi innuttaasut akornanni tuniluuttoqarpoq.

Tamatuma peqatigisaanik illoqarfimmi utoqqaat angerlarsimaffianni najugallit marluk Coronavirusimik tunillatsissimasut paasineqarpoq. Taakku tamakkiisumik kapitissimapput, aammalu Covid-19-imik tunillatsissimanertik napparsimassutiginngilaat. Aamma sulisunit pingasut tunillatsissimasut paasineqarpoq.

Sisimiuni utoqqaat angerlarsimaffianni najugaqartunit 43-nit, inuit marlussuit kisimik pinnatik, tamarmik kapitissimapput. Utoqqaat angerlarsimaffianni tuniluunnerup siaruaateqqinnissaa pinngitsoortinniarlugu arlalinnik iliuuseqartoqarpoq.

”Tuniluunneq utoqqaat angerlarsimaffianni najugaqartunut ulorianartorsiornerpaasunut anngussimammat annilaanganarpoq. Qujanartumik utoqqaat angerlarsimaffianni akiuussutissamik kapitissimasut procentinngorlugit qaffasipput, tamannalu matumani pisumi pingaaruteqartutut inississinnaavoq,” Nakorsaaneq Henrik L. Hansen oqarpoq.

Nuummi inuk ataaseq tunillatsissimasoq paasineqarpoq. Pineqartoq tunillatsissimasumut qanillisimavoq, kisiannili inunnut ataatsimoortunut tuniluunneq qanoq ililluni anngussimanersoq ilisimaneqanngilluinnarpoq. Sannavimmi Ajagaq-mi attaveqartoqarsimavoq.

”Pisut kingulliit tunngavigalugit takusinnaavarput, Nuummi taamatullu Sisimiuni innuttaasut akornanni tuniluunneq annertunerusinnaasoq. Mianersornissamut tunngavissaqartoqarluinnarpoq. Tassalu: Qanillinaveersaarit, katerittut orninnaveersaakkit aamma errortukulagit,” Henrik L. Hansen oqarpoq. 

Upernavimmi tunillatsissimasut tamarmik inoqutigiinni ataatsineersuupput, taamaattumillu tassani illoqarfinnut marluusunut sanilliullugu innuttaasut akornanni tuniluuttoqalernissaanut ulorianartorsiortoqanngitsoq Nakorsaaneqarfik naliliivoq.