Siggummi umimmannik toqoraaneq

Siggummi umimmannik toqoraanermut atatillugu Aalisarnermut Piniarnermullu Naalakkersuisoqarfimmiit matumuuna ilisimatitsissuteqassaagut erseqqissaateqarlutalu.

 

Naalakkersuisoqarfiup taamatullu Kalaallit Nunaanni Nakkutilliisoqarfik (KANUAANA) Siggummi umimmannik toqoraaneq pillugu suliaq ilungersunarluinnartutut isigivaat. Sumiiffiit umimmannik toqorarneqarsimasunik nassaarfiusut pingasuusut makkuupput: Arfertuarsuk Uummannap tungaaniit tikinneqartartoq kiisalu Millorfik aamma Amitsoq Upernaviup tungaaniit tikinneqartartut. Sumiiffinni taakkunani pingasuni umimmannik toqorarneqarsimasunik katillugit 20-it tungaanoortunik nassaarfiupput.

 

Nakkutilliisut suliaqapallannerat pillugu paasissutissanik katersisoqareerpoq maannakkullu Kalaallit Nunaanni politiit umimmaat toqorarneqarnerannut tunngasumik takunnissimasinnaasunik ujaasipput. Umimmannik toqoraanermut atatillugu takunnissimasinnaasut allatigulluunniit ilisimasaqarsinnaasut Naalakkersuisoqarfimmiit kaammattorusuppagut Politiinut imaluunniit Nakkutilliisunut saaffiginneqqullugit.

 

Siggummi umimmaat amerlasoorsuunngillat ukiumullu piaqqiarineqartartut killeqarlutik, taamaammat Siggummi killilimmik umimmattassiisoqartarpoq umimmanniarnissamullu akuersissutit qinnuteqartitsinikkut makitsisoqarnikkullu agguaanneqartarlutik. Umimmanniarnissamut akuersissutinik qinnuteqareernerup kingorna makitaasut kisimik umimmanniaqqusaapput taamaallaallu umimmammik ataatsimik pisaqaqqusaasarlutik. Siggummi umimmannik toqoraaneq unioqqutitsineruvoq ilungersunartoq akiliisitsinermik, arsaarinninnermik allaat piniarnermut allagartamik arsaarinninnermik kinguneqarsinnaasoq.   

 

 

 

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmi immikkoortortami pisortaq Amalie Jessen, amalie@nanoq.gl-mut saaffiginnittoqarsinnaavoq.