Meeqqat meeraanertik naallugu atugarissaarnerunissaat qulakkeerneqassaaq

Meeqqat atugarliortut sukkanerusumik nassaarineqartassapput, taamaalilluni meeraq atugarliortillugu ilinniartitsisut, perorsaasut aamma meeqqerisut ajornannginnerusumik ikiuinermik aallartitsisinnaaniassammata.  Meeqqat mikisuutillugilli pitsaasumik atugaqarnissaat qulakkeerniarlugu IT atorlugu atortorissaarut nutaaq misilinneqassaaq.

 

Meeqqap inuunerani siusissukkut atugarissaannginnerata paasineqarnissaa ajornannginnerulissaaq.  Paaqqinniffinniit atuarfimmut ikaarsaariarnerup ataqatigiinnissaa immikkut sianigineqassaaq.  Meeraq paaqqinniffimmi tapersersorneqarnissamik pisariaqartitsippat, taava atuarfimmi aallartinnerani IT atorlugu atortorissaarutip nutaap meeqqap atugarissaarnerata siumut isigisumik malinnaavigineqarnissaa qulakkiissavaa.  Meeqqat mikisuunerminniilli atugarliortut sukkasuumik nassaarineqassapput, taamaalillutik meeqqat pisariaqartinneqartumik sulianik ilisimasalimmit/nit sukkasuumik ikiorneqarnissaat aallartinneqarniassammat.  Peqqinnissaqarfimmut-, ilinniartitaanermut- aamma isumaginninnermut suliassaqarfiit akornanni suleqatigiinnermi ataatsimoorussamik systemeqalernikkut perorsaasut ilinniartitsisullu meeqqat ajunngitsumik inuuneqarnissaat pitsaanerusumik taamaalillutik qulakkiissavaat.  Taamaammat meeqqap meeraa tamaat systemi assigiiaartoq ingerlanneqassaaq.

 

Tunngaviit ataatsimoorussat aallaavigalugit suliaqarnikkut, ilinniartitsisunut, meeqqerisunut perorsaasunullu eqqortumik ikiuunnissap aallartinneqarnissaa ajornannginnerulissaaq.  “Piareersaatitut suliniut iluatsilluassappat, meeqqat akornanni atugarliornerup nassaarineqarnissaanut naleqqiullugu atortussatsinnik aqqutissiuilluartussamik peqalissaagut,” Meeqqanut, Inuusuttunut Ilaqutariinnullu Naalakkersuisoq Eqaluk Høegh oqarpoq.

 

IT atorlugu systemi Kalaallit Nunaanni pissutsinut immikkut naleqqussarneqarsimavoq.  Programmip Meeqqat 0-18-p, tassani meeqqat inuusuttullu tamarmik atugarissaarlutik ineriartorlutillu pitsaasumik inuuneqarnissaat qulakkeerinniffigineqarpoq, IT-kkut systemimik ineriartortitsisartoq suleqatigalugu sakku naleqqussarsimavaat, taamaalilluni oqaatsit assigiinngitsut arlallit tassani atorneqarsinnaallutik.

 

Piareersaatitut suliniutitut ingerlallugu systemi Ilulissani nunaqarfimmilu Saqqami misilinneqassaaq, tassani meeqqat 0-imiit – 6-linnut ukiullit akornanni atugarliorneq naniniarneqassalluni.

 

Attaveqarfissaq

Paasisaqarnerorusukkuit Immikkoortumi pisortaagallartoq Tina Evaldsen e-mail: tiev@nanoq.gl imaluunniit tlf. + 299 342394 atorlugit attavigiuk.