Naalakkersuisut Eqqumiitsuliornermut aningaasaateqarfimmik Kalaallit Nunaanni siullerpaamik pilersitsilerput

Namminersorlutik Oqartussat Kalaallit Nunaanni Eqqumiitsuliornermik aningaasaateqarfik pillugu nalunaarutaat Naalakkersuisut ullumi saqqummiuppaat, taamaalilluni Kalaallit Nunaanni Eqqumiitsuliornermik aningaasaateqarfimmik pilersitsinissamut suliaq aallartinneqarsinnaalerpoq.

Eqqumiitsuliornermut aningaasanik Aningaasanut Inatsimmit immikkoortinneqartut tapiissuteqartit aqunnissaat Kalaallit Nunaata eqqumiitsuliornermut aningaasateqarfinni siullersaasa pingaarnertut suliassaraa. Qinnuteqaatinik suliaqarneq eqqumiitsuliornermut aningaasanut tapiissutissatut immikkoortinneqarsimasunit maannakkut Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup sulisuisa ingerlataraat tapiissuteqartarnerlu Ilinniartitaanermut, Kultureqarnermut, Timersornermut Ilageeqarnermullu Naalakkersuisumit aalajangerneqartarluni.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Peter Olsen, ima oqaaseqarpoq: ”Qilanaarilluinnarsimavara Kalaallit Nunaanni Eqqumiitsuliornermut aningaasaateqarfiup pilersinneqarnissaa. Nuannaarutigaara Naalakkersuisutut nalunaarutigisinnaagakku, eqqumiitsuliornermut aningaasaliissutit attuumassuteqarfiginngisatsinnik tunniunneqartalernissaat piviusunngulermat. Siunissami eqqumiitsuliornermik aningaasaliissutit pillugit sullissineq aalajangiisarnerlu eqqumiitsuliornermik aningaasaateqarfimmit ingerlanneqartalissaaq Naalakkersuisuminngaanneerani. Inatsisartut Ukiakkut Ataatsimiinneranni 2018-imi aalajagingassatut siunnersuutigisimavara imannak oqaasertalerlugu: ”Naalakkersuisut kingusinnerpaamik UKA2019-imut inatsisinik atuuttunik allanngortitsinissaq pillugu siunnersuummik saqqummiussinissaat, taamaaliornikkut eqqumiitsuliornermut aningaasaateqarfimmik pilersitsinikkut eqqumiitsuliornermut aningaasaliissutinik tamanik agguaassinermi attuumassuteqannginnissamik pilersitsinissaq periarfissinneqarsinnaanissaat ilanngullugu Inatsisartuni aalajangiiffigisassatut siunnersuut”.

Naalakkersuisoq nangippoq: ”Nuannaarutigilluinnarpara aalajangigassatut siunnersuutiga ullumikkut piviusunngormat”.

Aningaasaateqarfiup qajannaatsumik toqqammaveqarnissaa allatseqarfimmit sullinneqarnerup qulakkiissavaa, taamaalilluni qinnuteqaatit qaffasissumik pitsaassusilimmik suliarineqartassallutik. Taassuma saniatigut eqqumiitsuliornermik aningaasaateqarfik kalaallit eqqumiitsuliaannik annertuumik ilisimasaqartutut inissisimassaaq, Naalakkersuisumit paasiniaavigineqarsinnaalluni.

Eqqumiitsuliornermik aningaasaateqarfik eqqumiitsuliornermik aningaasaateqarfimmit tapiiffigineqarnissamut qinnuteqaatinik siullermeerluni qinnuteqarfigineqarsinnaalissaaq 1. januar 2022 aallarnerfigalugu.

Kalaallit Nunaata Eqqumiitsuliornermut aningaasaateqarfia pillugu paasisaqarnerorusukkuit Naalakkersuisup allattaa attavigiuk, Paninnguaq Steenholdt e-mail: pslt@nanoq.gl oqarasuaat: 34 57 02